Emigracioni është kthyer në një fenomen shqetësues për Shqipërinë, për shkak të largimit të forcës punëtore.
Gjatë vitit 2018, sipas të dhënave të INSTAT, qarqet e Lezhës, Elbasanit dhe Beratit, kishin emigracionin më të lartë, në krahasim me pjesën tjetër të popullsisë.
Vetëm Vlora ka një bilanc pozitiv nga emigracioni, pasi ndërmjet të kthyerve dhe emigrantëve, diferenca është mbi 400, shkruan “Monitor”.
Përsa i përket lëvizjeve të brendshme, në Dibër, Gjirokastër dhe Kukës, kanë ndikuar në uljen e numrit të popullsisë në këto qarqe.
Në Tiranë gjatë 2018-ës, popullsia është zvogëluar si rezultat i migrimit të jashtëm me rreth 5 banorë për çdo 10 mijë, ndërsa është rritur me 81 banorë për çdo 10 mijë, si rezultat i lëvizjeve të brendshme.
Vlora dhe Tirana janë dy qarqet e vetme, të cilat janë rritur si rezultat i lëvizjeve të brendshme.
