Zhvillimi i Samitit të 3 të “Mini-Shengenit” ishte ngjarja më e bujshme e javës që lamë pas.
Ndër diskutimet e shumta mbi këtë çështje ka qenë fakti nëse BE e ka mbështetur apo jo këtë nismë.
Kryeministri Edi Rama ka deklaruar se ka patur mbështetjen e plotë të europianëve mbi këtë marrëveshje.
Mirëpo, Aleksandër Vuçiç në një intervistë për një media serbe ka deklaruar të kundërtën.
Sipas tij, “Mini-Shengeni” nuk kishte mbështetjen entuziaste të kryeqyteteve europiane.
Ai shtoi më tej se shumëkush në Europë nuk do që Ballkani të ndërtojë vetë fatin e tij.
Presidenti serb ka lavdëruar punën e Ramës për marrëveshjen, duke thënë se ka treguar një kurajo të veçantë.
“Rama, për nismën e Shengeni të vogël, ka treguar kurajë të rrallë,” tha ai gjatë intervistës.
Po ashtu ai ka folur edhe për Kosovën, por jo drejtpërdrejtë.
“Kryeministri Rama është në favor të bashkëpunimit tonë ekonomik, ndryshe nga disa të tjerë në rajon që këmbëngulin se ne duhet vetëm të kërkojmë ndjesë pasi jemi popull gjenocidal. Por kjo është politika e tyre.”
Kjo nxjerr edhe një herë në pah faktin që Serbia nuk do ndryshojë qendrim.
