Redjan Rraja, i dyshuari kryesor për atentatin ndaj prokurorit Ndoj, refuzoi sërish bashkëpunimin me organet e drejtësisë.
Burime jo zyrtare pranë grupit të hetimit bëjnë me dije se 34-vjçari ka refuzuar statusin e bashkëpunëtorit dhe për rrjedhim përfitimin e mbrojtjes së posaçme.
Edhe pse në makinën, nga e cila u qëllua mbi Arjan Ndojin, janë gjetur syzet e Rrajës dhe gjurmët e lëna përputhen me AND-në e tij, ai nuk e pranon diçka të tillë.
Dosja me provat që bëjnë fajtor Redjan Rrajën është gati nga grupi i hetimit dhe pritet t’i kalojë prokurorisë së posaçme SPAK.
Po ashtu një pistë tjetër është edhe “punësimi” i Rrajës për të kryer vrasjen nga një grup kriminal.
Kujtojmë se ngjarja e rëndë ndodhi ditën e 1 nëntorit, në mbikalimin e Shkozetit.
Nga ky atentat humbi jetën shoferi i prokurorit, Andi Maloku.
Rraja është i vetmi i arrestuar deri më tani për këtë ngjarje.
Gjykata e ka lënë të riun në burg deri në përfundimin e hetimeve.
