Tërmeti i 26 nëntorit në Durrës, nxorri në pah abuzimet dhe cilësnë e keqe të ndërtimeve në Durrës.
Një nga firmat më të mëdha ndërtuese në Durrës është “Kristi Konstruksion” me aksioner Arkenad Gripshin.
“Top Story” ka zbuluar, se në pallatet e ndërtuar nga kjo firmë ndërtimi, ka mangësi të rënda strukturore.
Pallati ndodhet në zonën e Plazhit dhe ka njëdëmtim të shkallës D4, e cila konsiderohet si një gradë larg shembjes.
Në këtë objekt bërthama e shkallës është në ajër, ndërsa mungojnë edhe strukturat antisizmike.
“Kristi Konstruksion” është një prej firmave të cilat janë furnizuar me beton nga kompania “3D”, me administrator Edmond Dakon, vëllain e ish-kryebashkiakut, Vangjush Dako.
Me betonin e kësaj firme është bërë pjesa më e madhe e ndërtimeve në Durrës.
Kompania u themelua fillimisht në vitin 2001 nga Vangjush Dako, i cili ia shiti aksionet vëllait të tij Artan Dako në vitin 2003, pasi iu fut politikës.
Ky i fundit do të ndahet nga jeta pak kohë më vonë dhe aksioneri kryesor i kompanisë bëhet vëllai tjetër, Edmond Dako.
Kompania e vëllait të Vangjush Dakos, është e përfshirë indirekt në betonizimin e qytetit.
Skema ishte e thjeshtë, që pallatet të merrnin leje, duhet të furnizoheshin nga kompania “3D”
Në një rast të zbardhur nga “Top Story”, Edmond Dako shfaqet si ortak me kompaninë “Kristi Konstruksion”, për ndërtimin e një pallati 9 katësh te Shkëmbi i Kavajës.
Së bashku me kompaninë, Edmond Dako, padit në Gjykatën Administrative Bashkinë e Durrësit dhe kërkon zbardhjen për pajisjen me formularin ligjor të lejes së ndërtimit për godinën në fjalë.
Padia është bërë më 8 prill 2017, në kohën kur Dako ishte ende kryetar bashkie në Durrës.
Ka dyshime se beteja është zhvendosur tek gjyqësore, për të shmangur plasjen e një skandali për konflikt interesi.
Dosja ndërkohë është ende në pritje për t’u shqyrtuar.
Përsa i përket pallatit në zonën e Plazhit të ndërtuar nga “Kristi Konstruksion”, rezulton se nuk janë marrë mostra betoni për të parë cilësinë.
Banorët e zonës shprehen, se një prej firmave të betonit është ajo e Dakos.
Raste të ngjashme janë regjistuar edhe në një pallat në afërsi të urës së Dajlanit dhe në kompleksin në lagjen 17, të ndërtuara po nga “Kristi Konstruksion”.
Dëmet janë të ngjashme dhe muret e brendshme janë të rrëzuara në tokë. Pallateve u është vënë shiriti dhe nuk lejohet askush të futet brenda.
