Ministrja e Arsimit, Besa Shahini në një konferencë për mediat, bëri me dije se mësimi në Kurbin, Durrës e Tiranë, do të fillojë më 9 dhjetor.
Shahini tha se në Lezhë dhe Mirditë mësimi do të fillojë nesër.
Ndërsa për 9 qarqet ku nuk ka pasur gjendje të jashtëzakonshme, ministrja bëri me dije se mësimi ka filluar normalisht.
“Qarku Durrës, bashkia Kurbin, Vorë dhe Tiranë fillojnë mësimin në 9 dhjetor, të tjerat nesër. Në 9 qarqe që nuk janë në gjendje të jashtëzakonshme mësimi ka filluar normalisht, ndërsa për tre qarqet e tjera do të fillojë nesër pjesërisht. Në Lezhë nesër fillon në bashkinë Mirditë, një shkollë e dëmtuar në Shënkoll dhe nesër nxënësit do të jenë të zhvendosur. Në Kurbin ka numër më të madh të shkollave të dëmtuara dhe mësimi fillon në 9 dhjetor që të bëhen riparimet. 4800 nxënës të prekur nga tërmeti.”, është shprehur ajo.
Për shkollat që rrezikojnë të mos hapen deri më 9 dhjetor, Shahini tha se ka bërë plan për zhvendosjen e tyre.
Ndërsa për kopshtet dhe shkollat private, pritet konfirmimi nga Instituti i Ndërtimit.
Në rang vendi, tërmeti i 26 nëntorit ka dëmtuar 26 shkolla. Në Thumanë dhe Bubq pritet të prishen dy shkolla, kurse në Tiranë ka pësuar dëmtime shkolla “Emin Duraku”, të cilës i është vënë edhe shiriti.
