Presidenti Ilir Meta ka bërë gati padinë ndaj kreut të Këshillit të Emërimeve në Drejtësi, Ardian Dvorani.
Më herët Meta e ka quajtur Dvoranin mafioz dhe ushtar të partisë.
Kreu i Shtetit akuzon kreun e KED, për shpërdorim detyre dhe përvetësim i titullit apo detyrës shtetërore.
Sipas Metës Dvorani ka kryer shkelje në përpilimin e listave të kandidatëve për Gjykatën Kushtetuese.
Padinë Kreu i Shtetit do ta dorëzoj të hënën.
“Së pari jam i gëzuar për fillimin e funksionimit të Gjykatës Kushtetuese. Së dyti, dëshiroj t’ju bëj të ditur vendimin tim si President i Republikës dhe Kryetar i Shtetit për të paraqitur ditën e hënë kallëzim penal si President i Republikës kundër zotit Ardian Dvorani me detyrë kryetar i Këshillit të Emërimeve në Drejtësi, me adresë Gjykata e Lartë Tiranë. unë president i Republikës dhe Kryetar i Shtetit akuzoj Ardian Dvoranin për këto vepra penale: shpërdorim detyre dhe përvetësim i titullit apo detyrës shtetërore. Baza ligjore Kushtetuta e Republikës së Shqipërisë. Të nderuar zonja dhe zotërinj prokurorë, Presidenti i Republikës në cilësinë e Kreut të Shtetit, sipas ligjit për Gjykatën Kushtetuese dhe organet në sistemin në drejtësi ka ndjekur procesin e funksionimit të reformës në drejtësi. Presidenti në vijimësi ka bërë thirrje kundrejt të gjithë institucioneve të përfshira në proces në respektimin e Kushtetutës dhe Ligjit”, deklaroi Meta.
Konflikti institucional nisi pas dekretimit të Marsida Xhaferllarit nga Meta.
Ky i fundit nuk pranoi të dekretonte Arta Vorpsin, pasi sipas tij, emërimi i saj nga Kuvendi ishte anti-kushtetues.
Me këtë lëvizje të Metës, u bënë dy kandidate për të njëjtin post në Kushtetuese.
Ndërkohë Gjykata Kushtetuese në një deklaratë të fundit, ka njohur anëtaret e betuara te presidenti.
