Kontroll blic në qelinë e Veliajt pas letrës për Ballukun, Ndreca: Intimidim dhe presion!

Një kontroll i befasishëm është ushtruar në qelinë e kryebashkiakut të Tiranës, Erion Veliaj, vetëm pak minuta pas publikimit të letrës së tij drejtuar Belinda Ballukut. Avokati i Veliajt, Plarent Ndreca, e ka cilësuar ndërhyrjen si një përpjekje për intimidim dhe presion ndaj klientit të tij.
Në një prononcim për News24, Ndreca deklaroi se ishte njoftuar personalisht nga Veliaj, përmes telefonit të burgut, se menjëherë pas publikimit të letrës në media, në qelinë e tij kishte mbërritur një grup kontrolli nga Drejtoria e Fierit.
Sipas avokatit, kontrolli nuk ishte pjesë e procedurave rutinë, por një veprim që synonte të ushtronte presion ndaj Veliajt. Ai ngriti gjithashtu shqetësimin se punonjësit që kryen kontrollin kishin paralajmëruar mundësinë e ardhjes së një grupi tjetër nga Tirana.
Ndreca theksoi se kryebashkiaku ndodhet në kushte të rrepta izolimi dhe mbikëqyrjeje, me një punonjës policie të vendosur vazhdimisht pranë derës së qelisë dhe me shoqërim policor gjatë çdo lëvizjeje.
Deklarata e plotë e Plarent Ndrecës:
“Zoti Veliaj më komunikoi në telefon këtë fakt që direkt pas publikimit të letrës në media ka shkuar një kontroll blic nga drejtoria e Fierit. Dhe më ka komunikuar nga telefoni i burgut. Më ka njoftuar këtë informacion që tregon mënyrën se si sillet administrata e burgut dhe lidhjes së qartë të mendimit të zotit Veliaj. Ndërkohë që ai është i izoluar, ka një polic tek dera gjithë kohës dhe shoqërohet gjithë kohës me polic. Përsëri nuk mjaftojnë këto masa izoluese, dhe kontrolli ka pasur si qëllim intimidimin. Për kontrollin kanë thënë se ‘thjesht kemi urdhër’, madje kanë shtuar që mund të vijnë nga Tirana për të bërë kontroll. Këto nuk janë kontrolle rutinë, janë të lejueshme, por jo rutinë. Për më tepër që zoti Veliaj nuk është si të burgosurit e tjerë, ka një polic gjithë kohës tek dera, është e pamundur që zoti Veliaj të ketë gjëra të paligjshme në qeli sepse kjo do të ishte dështim i plotë i administratës”, tha Ndreca.
Kontrolli vjen menjëherë pas letrës së Veliajt drejtuar Ballukut, ndërsa avokati i tij e lidh kohën e ndërhyrjes me publikimin e saj. Megjithëse Ndreca pranon se kontrollet në qeli janë të lejueshme, ai kundërshton karakterin rutinë të këtij veprimi dhe kërkon që ai të shihet si një përpjekje për intimidim.
Deri në këtë moment, në informacionin e bërë publik nuk ka një shpjegim zyrtar nga administrata penitenciare mbi arsyet e kontrollit apo pretendimet e ngritura nga mbrojtja e Veliajt.