Absurdi me Ballukun: Rrezikon deri në 35 vite burg për 9 tendera, korrupsion e pastrim parash, por SPAK zvarrit hetimet për herë të tretë!

Nëntë raste manipulimi tenderash, dy akuza korrupsioni, dy raste fshehjeje pasurie dhe pastrim parash në bashkëpunim. Belinda Balluku përballet me një dosje që, në rast të provimit të të gjitha akuzave, mund të sjellë teorikisht deri në 35 vite burg. Por edhe pas një viti hetimesh, SPAK kërkon sërish kohë. Për herë të tretë!

Prokuroria e Posaçme i komunikoi sot ish-zëvendëskryeministres akuzat përfundimtare, ndërsa avokati i saj, Ardian Kalia, konfirmoi se hetimet do të zgjaten përsëri. Sipas raportimeve, afati i ri shkon deri në janar 2027.

Por çfarë përmban konkretisht dosja dhe sa vite burg parashikon Kodi Penal për secilën akuzë?

Shkelja e barazisë në tendera, në bashkëpunim, nëntë herë – neni 258/2 dhe 25: Nga 1 deri në 5 vite burg për secilin rast. Vetëm nëntë episodet e tenderave kanë një shumë teorike maksimale prej 45 vitesh dënimesh individuale, përpara zbatimit të rregullave të bashkimit të tyre.

Korrupsioni pasiv i personave që ushtrojnë funksione publike – neni 259: Nga 2 deri në 3 vite burg për përfitime deri në 50 mijë lekë dhe nga 3 deri në 8 vite për përfitime mbi këtë vlerë.

Korrupsioni pasiv i funksionarëve të lartë shtetërorë – neni 260: Nga 4 deri në 12 vite burg.

Fshehja ose deklarimi i rremë i pasurisë, dy herë – neni 257/a/2: Gjobë ose deri në 3 vite burg për secilin rast.

Pastrimi i parave, në bashkëpunim dhe më shumë se një herë – neni 287/2: Nga 7 deri në 15 vite burg, akuzë që lidhet me dy pasuri të paluajtshme.

Sipas nenit 55 të Kodit Penal, dënimet për disa vepra bashkohen në një dënim të vetëm, i cili mund të arrijë kufirin maksimal prej 35 vitesh burgim me afat. Pra, Balluku nuk përballet me një shkelje të izoluar, por me një shumësi akuzash që mund të sjellin pasoja tepër të rënda penale.

Dhe me gjithë këtë dosje, SPAK ende nuk i ka dhënë fund hetimit!

Që në tetor 2025, Balluku u mor e pandehur për Tunelin e Llogarasë, një tender me fond limit afro 19 miliardë lekë. Më pas dolën dyshimet për lotet e Unazës së Madhe, ndërhyrjet në procedurat e prokurimit, përfitimet e paligjshme dhe pasuritë e fshehura. SPAK sekuestroi dy vila dhe identifikoi dyshime të reja për korrupsion gjatë drejtimit të Albcontrol.

Madje, që në dhjetor 2025, vetë SPAK e konsideroi të nevojshëm arrestimin e Ballukut dhe kërkoi autorizimin e Kuvendit. Kërkesa u rrëzua më 12 mars nga shumica socialiste, me 82 vota kundër.

Atëherë, përse sot, kur dosja është rënduar dhe akuzat janë shumëfishuar, hetimet vazhdojnë të shtyhen?

Çfarë tjetër duhet të zbulohet përpara se çështja të përballet me gjykatën? Përse veprimet hetimore nuk janë përfunduar brenda afateve të mëparshme? Dhe kush mban përgjegjësi për këtë zvarritje të përsëritur?

Në një çështje ku ish-numri dy i qeverisë akuzohet për korrupsion dhe pastrim parash, çdo muaj shtesë hetimi ngre edhe shqetësimin për ruajtjen e provave dhe ndikimin e mundshëm mbi dëshmitarët. SPAK duhet të bëjë të qartë se çfarë masash ka marrë për të parandaluar këto rreziqe.

Çështja e imunitetit parlamentar duhet të rikthehet urgjentisht në Kuvend. Nëse kushtet ligjore për arrestimin vijojnë të ekzistojnë, SPAK duhet të kërkojë sërish autorizimin, ndërsa deputetët duhet të mbajnë përgjegjësi publike për votën e tyre.

Akuzat penale nuk zëvendësojnë vendimin e gjykatës. Por ato kërkojnë një përgjigje serioze nga drejtësia, jo një kalendar të pafund shtyrjesh.

Tre zgjatje hetimesh, nëntë tendera, akuza për korrupsion, pastrim parash dhe fshehje pasurie. SPAK ka kërkuar arrestimin, ka sekuestruar pasuri dhe tashmë ka komunikuar akuzat përfundimtare. Çfarë po pret ende për ta çuar Belinda Ballukun përpara gjykatës?