Skandal në Lushnje/ Arrestohet mësuesi 60-vjeçar, i çonte mesazhe seksuale nxënëses 13-vjeçare

Një rast i rëndë është zbuluar në Lushnjë, ku një mësues 60-vjeçar ka përfunduar në prangat e policisë, nën dyshimin se ka ngacmuar seksualisht përmes mesazheve një nxënëse vetëm 13 vjeçe.

Sipas njoftimit zyrtar të Policisë së Shtetit, i arrestuari është shtetasi M. S., 60 vjeç, me detyrë mësues në një shkollë në Lushnjë. Ai dyshohet se ka komunikuar me të miturën duke i dërguar mesazhe me karakter seksual.

Rasti bëhet edhe më shqetësues për shkak të raportit mes palëve, pasi i dyshuari ushtronte profesionin e mësuesit, ndërsa vajza është vetëm 13 vjeçe dhe nxënëse.

Policia nuk ka bërë të ditur deri tani emrin e shkollës ku punonte 60-vjeçari, mënyrën se si janë zbuluar komunikimet apo nëse denoncimi është bërë nga e mitura, familjarët e saj apo persona të tjerë. Po ashtu, nuk janë publikuar detaje mbi kohëzgjatjen apo përmbajtjen konkrete të mesazheve.

Në komunikatën e Policisë së Shtetit për ngjarjet e 24 orëve të fundit konfirmohet arrestimi i M. S. dhe dyshimi për ngacmim seksual të 13-vjeçares përmes mesazheve.

Materialet procedurale i janë kaluar Prokurorisë së Fierit, e cila pritet të vijojë hetimet për zbardhjen e plotë të rastit dhe rrethanave në të cilat ka ndodhur komunikimi mes mësuesit dhe të miturës.