Divorcet rriten ndjeshëm në Kosovë, 147 çifte i japin fund martesës në një muaj

Numri i divorceve në Kosovë ka shënuar një rritje të ndjeshme gjatë qershorit 2026. Sipas të dhënave administrative, brenda këtij muaji janë regjistruar 147 raste shkurorëzimi, 30 më shumë se në maj, kur ishin evidentuar 117 raste.

Në përqindje, numri i shkurorëzimeve është rritur me 25.6% brenda vetëm një muaji, duke treguar një rritje të dukshme të çifteve që kanë përfunduar ligjërisht martesën.

Rritja e divorceve është regjistruar në të njëjtën periudhë kur në Kosovë është shtuar edhe numri i martesave. Gjatë qershorit 2026 janë regjistruar gjithsej 1 mijë e 279 kurorëzime, brenda dhe jashtë Kosovës, nga rreth 1 mijë e 37 që ishin regjistruar në maj. Kjo përfaqëson një rritje prej 23.3%.

Megjithatë, në përqindje, shkurorëzimet janë rritur më shumë se kurorëzimet: 25.6% kundrejt 23.3%.

“Në muajin qershor 2026 janë regjistruar gjithsej 1 279 kurorëzime (brenda dhe jashtë Kosovës). Krahasuar me muajin maj 2026, në muajin qershor 2026 numri i kurorëzimeve u rrit me 23,3%. Ndërsa, gjatë muajit qershor 2026, janë regjistruar 147 raste të shkurorëzimeve në Kosovë. Krahasuar me muajin maj 2026, numri i shkurorëzimeve u rrit me 25,6%”.

Nëse krahasohen vetëm regjistrimet e të njëjtit muaj, në qershor janë evidentuar rreth 11.5 shkurorëzime për çdo 100 kurorëzime. Megjithatë, kjo nuk nënkupton se 11.5% e martesave të lidhura gjatë qershorit kanë përfunduar në divorc, pasi shkurorëzimet mund t’u përkasin martesave të lidhura në vite të ndryshme.

Të dhënat demografike për qershorin tregojnë ndryshime edhe në lindje dhe vdekje. Gjatë muajit janë regjistruar 2 mijë e 674 lindje, brenda dhe jashtë Kosovës, prej të cilave 1 mijë e 399 meshkuj dhe 1 mijë e 275 femra. Krahasuar me majin, numri i lindjeve është rritur me 14.9%.

Në të njëjtën periudhë janë regjistruar 920 raste vdekjesh, prej të cilave 494 meshkuj dhe 426 femra. Edhe numri i vdekjeve ka shënuar rritje, me 5.6% krahasuar me muajin paraardhës.

Të dhënat për lindjet, vdekjet, kurorëzimet dhe shkurorëzimet bazohen në regjistrimet administrative për muajin qershor 2026.