Tronditet UEFA/ “The Telegraph” zbulon aferën e dyshuar të Infantinos: 150 mijë paund për largimin e “të dashurës”, mund t’i hetohen 16 vitet në organizatë

Një investigim i “The Telegraph” ka ngritur akuza të rënda mbi të kaluarën e Gianni Infantino-s në UEFA. Sipas gazetës britanike, një ish-punonjëse, me të cilën presidenti aktual i FIFA-s dyshohet se kishte një marrëdhënie të fshehtë, mori mbi 150 mijë paund për t’u larguar nga organizata në fund të vitit 2011.

Në atë kohë Infantino ishte sekretar i përgjithshëm i UEFA-s. Gruaja, identiteti i së cilës nuk është publikuar, thuhet se kaloi nga një pozicion administrativ në një rol drejtues, me një rritje page prej rreth 25 mijë paundësh. UEFA dyshohet se i mbuloi gjithashtu tarifat për studimet MBA.

Sipas “The Telegraph”, çështja shkaktoi përplasje brenda UEFA-s dhe presidenti i atëhershëm Michel Platini e përballoi Infantino-n me pretendimet për marrëdhënien. Më pas u arrit marrëveshja për largimin e gruas kundrejt pagesës.

UEFA ka konfirmuar se një ish-punonjëse mori një pagesë largimi, por nuk ka zbuluar identitetin e saj apo se kush e autorizoi shumën.

Infantino, i martuar dhe baba i katër fëmijëve, mohon kategorikisht marrëdhënien. FIFA gjithashtu e ka mbrojtur presidentin e saj.

“Nën drejtimin e zotit Infantino, gjithçka është bërë gjithmonë në mënyrë korrekte”, ka deklaruar një zëdhënës i FIFA-s.

Por çështja mund të zgjerohet. Sipas “The Telegraph”, UEFA po shqyrton një hetim mbi 16 vitet e Infantino-s në organizatë, për të zbuluar se kush autorizoi pagesën dhe nëse marrëdhënia e pretenduar ndikoi në karrierën e ish-punonjëses.

Ish-zyrtari i etikës në FIFA, Hans-Joachim Eckert, ka paralajmëruar se nëse provohet se Infantino ka marrë vendime financiare duke anashkaluar organet kompetente, çështja mund të kalojë në “fushën e aktivitetit potencialisht kriminal”.

Deri tani nuk ka një konstatim zyrtar që lidh pagesën me marrëdhënien e pretenduar apo që provon shkelje nga Infantino.