100 milionë dollarë dhe një diamant 33 karatësh, kush është dentistja që mund të trashëgojë pasurinë e Jeffrey Epstein

Karyna Shuliak, një dentiste 37-vjeçare me origjinë nga Bjellorusia, mund të jetë një nga përfitueset kryesore të pasurisë së Jeffrey Epstein, financierit amerikan që vdiq në burg në vitin 2019. Sipas raportimeve të The New York Times, ajo mund të trashëgojë deri në 100 milionë dollarë, si edhe një diamant prej 33 karatësh me vlerë shumë të lartë.

Shuliak dhe Epstein thuhet se kanë qenë në një lidhje për rreth tetë vjet. Marrëdhënia e tyre përmendet edhe në dokumentet e publikuara nga Departamenti Amerikan i Drejtësisë. Sipas raportimeve, ajo ishte personi i fundit me të cilin Epstein foli në telefon përpara se të gjendej i vdekur në qelinë e tij.

Mediat amerikane raportojnë se dyshja u njoh kur Shuliak ishte 21 vjeçe dhe sapo kishte mbërritur në Nju Jork. Epstein e përshkruante atë si “të preferuarën e tij” dhe, sipas raportimeve, e ndihmoi të regjistrohej në Shkollën e Stomatologjisë të Universitetit Columbia, si edhe të siguronte lejen e qëndrimit në Shtetet e Bashkuara.

Sipas The New York Times, Epstein i kishte sugjeruar gjithashtu se martesa me një nga viktimat e tij do të ishte mënyra më e shpejtë për të përfituar kartën e gjelbër. Gjatë viteve të lidhjes së tyre, çifti udhëtoi në vende të ndryshme të botës, ndërsa Shuliak thuhet se dërgoi shuma të konsiderueshme parash për familjen e saj në Bjellorusi.

Me kalimin e kohës, Epstein i besoi asaj administrimin e një pjese të aseteve të tij, duke nxitur spekulime se dentistja mund të jetë një nga trashëgimtaret kryesore të pasurisë së tij, e cila vlerësohet në dhjetëra miliona dollarë. Megjithatë, deri tani nuk ka një konfirmim zyrtar se si do të ndahet përfundimisht trashëgimia e ish-financierit amerikan.