Gazetari Osman Stafa, ka reaguar pas sulmit nga dy persona pranë qendrës së Tiranës mbrëmjen e së dielës, duke e cilësuar ngjarjen si një sulm të drejtpërdrejtë për shkak të detyrës së tij si gazetar dhe angazhimit qytetar në mbështetje të protestës.
Pas denoncimit në Komisariatin nr.3, Stafa foli në një lidhje direkte për News24, ku mohoi pretendimet e Policisë së Shtetit se ai u kishte kërkuar dy personave të përfshirë në incident se përse nuk ishin në protestë.
“Ishin individë të cilët erdhën qëllimisht të më sulmonin për angazhimin qytetar”, tha ai.
Gazetari tregoi se në momentin e sulmit ndodhej në shoqërinë e dy gazetarëve të huaj, një italian dhe një polake, ndërsa po marshonin për të kapur turmën e protestuesve.
“Ishim në shoqërinë e 2 gazetarëve të huaj, një italian dhe një polake, po marshonim për të kapur turmën. 2 persona na kanë prerë rrugën duke ofenduar si dhe më kanë lënduar lehtë fizikisht, duke më cilësuar si një person që punën time nuk e bëj mirë. Nuk kam reaguar ndaj këtij provokimi”, u shpreh Stafa.
Sipas tij, autorët e sulmit ishin të shqetësuar për raportimet dhe mbështetjen që ai i ka dhënë protestës.
“Ishin 2 persona që ishin të shqetësuar për raportimet dhe mbështetjen që i kam dhënë protestës. E dinin që isha gazetar dhe erdhën duke më çjerrë me thonj. Nuk jam shoqëruar, por kam ardhur në Policinë e Shtetit për të kallëzuar 2 personat. Ishte sulm i mirëfilltë ndaj detyrës time si gazetar”, deklaroi ai.
Stafa tha gjithashtu se ka marrë kërcënime edhe më herët për shkak të punës së tij.
“Kam marrë edhe kërcënime në të kaluarën se po u paraqita para spitalit Onkologjik do më rrezikohet jeta. Ky është mesazhi që kam kallëzuar disa kohë më parë në Policinë e Shtetit”, tha gazetari.
Ngjarja vjen në një moment tensionesh të forta politike dhe qytetare, ndërsa protesta vijon të mbajë të ndezur përplasjen mes qytetarëve dhe pushtetit. Për Stafën, sulmi nuk ishte një incident i rastësishëm, por një mesazh ndaj një gazetari që ka raportuar dhe mbështetur publikisht kauzën e protestës.
