Një aksident tragjik me pasojë vdekjen e një 7-vjeçari është regjistruar në aksin rrugor Elbasan-Librazhd, duke rikthyer shqetësimin e banorëve për rrezikshmërinë e zonës dhe mungesën e sigurisë në rrugë.
Sipas dëshmive të banorëve, automjeti që përplasi të miturin lëvizte me shpejtësi të lartë, ndonëse drejtuesi i mjetit ka pretenduar se po udhëtonte me rreth 10 km/h.
“Shoferi thoshte që është në rrugë nacionale. ‘Kam të drejtën time. Kam qenë më 10 km në orë’, ka thënë shoferi. Në këtë rrugë ka ndodhur dhe një tjetër ngjarje e rëndë. Rruga është bërë shumë e rrezikshme në këtë lagje”, u shpreh një banor i zonës.
Një tjetër banore tregoi momentet dramatike pas aksidentit, duke pretenduar se ambulanca mbërriti me vonesë, ndërsa fëmija u transportua drejt spitalit me një automjet të rastit.
“E kanë parë që ishte me shpejtësi maksimale. Edhe pse ka thënë që ishte me 10 km/h. Erdhën gjithë burrat nga lokali, ngritën makinën që nxorën fëmijën. Thirrën ambulancën, nuk erdhi. E morën me makina të rastit dhe e çuan në spital. Ambulanca erdhi pas 15 minutash nga momenti që fëmija u nis në spital. Rruga është shumë e rrezikshme. Bëhen shumë aksidente”, tha ajo.
Sipas Policisë, 7-vjeçari u përplas nga një automjet i drejtuar nga shtetasi me iniciale P.B., 61 vjeç. Uniformat blu kanë bërë me dije se drejtuesi i mjetit është ndaluar dhe shoqëruar në Komisariat për veprime të mëtejshme procedurale.
Nga informacionet paraprake mësohet se i mituri po kalonte rrugën për të shkuar në shkollë, kur i ka shpëtuar nga dora nënës dhe është përplasur nga automjeti.
