Kupa e Botës 2026 pritet të jetë edicioni më i madh në historinë e futbollit, por bashkë me spektaklin dhe emocionet po rritet edhe shqetësimi për kushtet klimatike. Turneu që do të zhvillohet në Shtetet e Bashkuara, Kanada dhe Meksikë mund të përballet me temperatura ekstreme në disa prej stadiumeve kryesore.
World Weather Attribution, një grup shkencëtarësh që studion ndikimin e ndryshimeve klimatike, paralajmëron se disa ndeshje mund të luhen në kushte të rrezikshme për lojtarët.
“Duke përdorur një model statistikor të aplikuar në vëzhgime, zbuluam se në Kupën e Botës të këtij viti, 26 ndeshje pritet të luhen në kushte prej të paktën 26°C, nga të cilat 9 do të luhen në stadiume pa ajër të kondicionuar”, deklaruan ata.
Vëmendja kryesore është përqendruar te Miami, Kansas City dhe East Rutherford, ku stadiumet e hapura mund të kthehen në ambiente shumë të vështira për futbollistët, sidomos gjatë orareve me temperatura të larta.
Përballë këtij rreziku, FIFA ka bërë të ditur se po punon me autoritetet dhe ekspertët mjekësorë për të garantuar një garë të sigurt. Organizata ka hartuar një plan emergjence që bazohet te monitorimi shkencor i nxehtësisë dhe te ndryshimet në organizimin e ndeshjeve.
Në qendër të këtij plani është indeksi WBGT, i cili mat stresin real të nxehtësisë në trup duke kombinuar temperaturën dhe lagështinë. Nëse treguesi arrin 28°C, aktivizohet alarmi i sigurisë. Nëse arrin 32°C, hyjnë në fuqi masa të detyrueshme emergjente.
Mes masave të parashikuara janë pushimet tre-minutëshe për hidratim në çdo pjesë të ndeshjes, si dhe instalimi i stolave me klimë të kontrolluar në stadiumet e hapura. Këto hapësira do t’u japin mundësi lojtarëve titullarë dhe zëvendësuesve të mbrohen nga nxehtësia gjatë takimeve.
Ndërsa Botërori 2026 pritet të sjellë një spektakël të jashtëzakonshëm sportiv dhe mediatik, sfida më e madhe mund të mos jetë vetëm në fushë, por edhe përballja me një realitet klimatik gjithnjë e më të ashpër.
