Pas aksidentit tragjik në Durrës, ku humbën jetën dy të mitur dhe u plagos një tjetër, Policia Rrugore ka njoftuar masa të reja për monitorimin e qarkullimit dhe goditjen e shkeljeve që lidhen me aksidentet fatale.
Drejtori i Departamentit për Rendin dhe Sigurinë Publike, Dhimitraq Ziu, deklaroi se janë kalibruar 22 mjete shpejtësimatëse dhe të gjitha strukturat e Policisë Rrugore janë pajisur me dronë, kamera, aparate fotografike, alkooltestues dhe drogëtestues.
Sipas tij, në akset nacionale patrullat nuk do të ndalojnë automjete pa shkak, por do të monitorojnë qarkullimin me pajisje logjistike dhe patrulla të lëvizshme. Çdo shkelje do të dokumentohet dhe do të pasqyrohet në kohë reale në sistemin e-Albania.
Policia paralajmëron se ndërhyrja do të jetë e menjëhershme për drejtuesit që lëvizin me shpejtësi të lartë, bëjnë parakalime të rrezikshme apo manovra agresive në rrugë.
Në zonat urbane do të vijojnë kontrollet për alkoolin, përdorimin e celularit, rripin e sigurimit dhe parkimet e paligjshme, ndërsa në fokus do të jenë edhe drejtuesit me shkelje të përsëritura.
Nga analiza e 4-mujorit të vitit 2026 rezulton se janë arrestuar 1009 drejtues mjetesh për drejtim në gjendje të dehur ose pa leje drejtimi. Ndërkohë, mbi 82 mijë drejtues janë ndëshkuar për shpejtësi mbi normat e lejuara dhe 27 mijë për parakalime të gabuara.
Policia thekson se shpejtësia mbetet shkaku kryesor i aksidenteve me pasoja fatale në vend.
