Industria e call centerave, e promovuar vite më parë si model punësimi nga kryeministri Edi Rama, sot përballet me akuza të forta për mashtrime ndërkombëtare dhe mbrojtje nga strukturat e shtetit. Gazetari investigativ Artan Hoxha deklaron se këto biznese funksionojnë vetëm me mbështetjen e policisë dhe me tarifa fikse për çdo tavolinë.
Në një intervistë për emisionin “Kafe Shqeto” në Syri TV, Hoxha theksoi përhapjen e gjerë të kësaj industrie në vend: “Nuk ka qytet të madh në Shqipëri që nuk ka nga këto lloj biznese Janë të shtrira aq sa lojrat e fatit”.
Ai kujtoi se në fillim kjo industri u promovua si mundësi për paga të larta: “Nëse i kthehemi disa vite më parë, ka qenë një industri, të cilën po e promovonte kryeministri i vendit, nëse e kujtoni. Mbaj mend që thoshin që të punuar nga Korça, mund të kesh rroga 3.000, 4.000 euro apo 5.000 euro”.
Sipas tij, mungesa e filtrave dhe kontrolleve çoi në përhapjen e aktivitetit kriminal: “Dhe ky ka qenë dhe fillimisht një nga motivet pse nuk pati asnjë lloj filtri, asnjë lloj kontrolli për të parë realisht çfarë po ndodhte aty”.
Hoxha tha se kishte paralajmëruar për pasojat në raport me vendet europiane: “Unë vetë kam patur mundësi në një emision atëherë me përballë kryeministrin, duke thënë që shikoni, jemi duke krijuar një problematikë shumë të madhe me vendet e Bashkimit Europian…”.
Ai shtoi se sot Shqipëria është nën presionin e operacioneve të huaja, pasi viktimat kryesore janë qytetarë europianë.
Gazetari ngriti akuza të drejtpërdrejta për rolin e policisë: “Call Centerat bashkë me lojërat e fatit janë dy industritë më fitimprurëse për agjencitë e zbatimit të ligjit dhe sidomos për policinë e shtetit”.
Sipas tij, këto biznese nuk mund të hapen pa miratimin e strukturave: “Është një lloj biznesi që nuk funksionon dot pa marrë miratimin dhe mbështetjen e policisë së shtetit”.
Hoxha solli edhe një shembull konkret për mënyrën si zhvendosen këto struktura: “U njoftuan në kohë dhe për tërë natën shkoi një nga këto automjetet dum-dum aty dhe ata menjëherë morën kompjuterat, tavolinat, i hoqën nga aty dhe i çuan në një vend tjetër”.
Ai shpjegoi edhe mënyrën e pagesave dhe rrjetin e mbrojtjes: “Pra, ti paguan inspektorin që mbulon zonën… Pastaj ata krijojnë rrjetën e cila të mbulon ty”.
Sipas Hoxhës, tarifat janë të qarta dhe të strukturuara: “Për këtë lloj biznesesh ilegale, tarifat fikse variojnë nga 500 euro për tavolinë… deri në 1500 euro”.
Dhe në fund, ai e përmblodhi mekanizmin: “Për çdo tavolinë që ti vendosje, paguaje tarifën… dhe ata merrnin përsipër pastaj sigurinë tënde”.
Sipas tij, pikërisht kjo lidhje shpjegon edhe zhdukjen e shpejtë të këtyre aktiviteteve kur zbulohen, pasi informacioni rrjedh nga brenda strukturave që duhet t’i godasin.
