Një situatë tronditëse është regjistruar në Korçë, ku një adoleshente ka tentuar për herë të tretë të ndërmarrë një akt ekstrem, duke rrezikuar jetën e saj.
Ngjarja ka ndodhur në një pallat në qytet, ku e reja është parë në një moment kritik, ndërsa gjithçka ka qenë çështje sekondash. Një i ri ka hyrë me shpejtësi në hyrjen e pallatit dhe ka ndërhyrë në kohë, duke arritur ta ndalojë dhe të shmangë një tragjedi që mund të kishte pasoja fatale.
Në vendngjarje kanë mbërritur menjëherë edhe shërbimet e policisë, të cilat kanë ndërhyrë për të vënë situatën nën kontroll.
Sipas raportimeve paraprake, kjo është hera e tretë që adoleshentja përfshihet në një situatë të tillë alarmante. Dy ditë më parë ajo ishte në një episod të ngjashëm në banesën e saj, ndërsa rreth tre muaj më parë ishte përfshirë në një tjetër rast të rëndë në të njëjtin ambient.
Të dhënat paraprake sugjerojnë se e reja mund të jetë ndikuar nga një gjendje e rënduar emocionale, e lidhur me konfliktet e vazhdueshme në lagje dhe përplasjet brenda familjes. Mësohet gjithashtu se familja jeton në kushte të vështira ekonomike, ndërsa babai ndodhet në burg.
Deri në këto momente nuk ka një njoftim zyrtar nga autoritetet për shkaqet e plota të kësaj ngjarjeje, ndërsa rasti ka rikthyer vëmendjen mbi nevojën për ndërhyrje dhe mbështetje në raste të tilla delikate.
