Ndërsa ndaj tij është në fuqi masa e sigurimit “arrest me burg” për akuzën e grupit të strukturuar kriminal në dosjen e tenderave të AKSHI-t, Ermal Beqiri arrin të sigurojë një kontratë publike me vlerë 2.6 milionë euro nga vetë Këshilli i Lartë Gjyqësor. Një situatë që vendos përballë njëra-tjetrës drejtësinë penale dhe fondet publike.
Kompanitë e tij, Soft Solution dhe Horizon, janë shpallur fituese të procedurës me objekt “sistem ENTERPRISE SERVICE BUS (ESB)”, me kohëzgjatje 3-vjeçare. Pra, për tre vite radhazi, këto subjekte do të përfitojnë para publike, ndërkohë që pronari i tyre është nën hetim dhe me masë sigurimi të paekzekutuar.
Tenderi u hap në verën e vitit 2025. Në garë morën pjesë edhe ABS e Gerond Meçes, në bashkëpunim me Data Log të Sokol Sinanit, të cilat ofruan 256 milionë lekë të rinj. Bashkimi i operatorëve Soft Solution dhe Horizon ofroi 253 milionë lekë dhe u rendit i pari.
Ankesa e Meçes dhe Sinanit në Komisionin e Prokurimit Publik u rrëzua me vendimin nr. 1937, datë 30 dhjetor 2025. Por çështja nuk u mbyll aty. Më 13 janar 2026, Gjykata Administrative e Apelit vendosi “masën e sigurimit të padisë, duke urdhëruar, pezullimin e efekteve juridike të vendimit të KPP-së si dhe ndalimin e lidhjes dhe ekzekutimit të kontratës që buron nga procedura e prokurimit, deri në dhënien e një vendimi të formës së prerë të çështjes së themelit”.
Pavarësisht këtij vendimi për pezullim, KLGJ shpalli fituese kompanitë e Beqirit. Në dokumentacionin e gjykatës nuk rezulton informacion nëse ka një vendim të formës së prerë mbi themelin e çështjes.
Rasti ngre një kontrast të fortë institucional. Nga njëra anë, një person i akuzuar për përfshirje në grup të strukturuar kriminal dhe me masë “arrest me burg” në fuqi. Nga ana tjetër, një kontratë 3-vjeçare me miliona euro nga institucioni që administron sistemin gjyqësor.
Si është e mundur që një operator ekonomik në pronësi të një personi në këtë situatë penale të vijojë të shpallet fitues i tenderave publikë? Çfarë mesazhi jep kjo për standardin e integritetit në prokurimet që financohen nga taksat e qytetarëve?
