Drejtoria e Përgjithshme e Burgjeve ka hedhur poshtë pretendimet për orarin e transferimit të kryebashkiakut Erion Veliaj drejt Gjykata e Posaçme kundër Korrupsionit dhe Krimit të Organizuar.
Në reagimin e saj publik, Drejtoria e Përgjithshme e Burgjeve sqaron se deklaratat e bëra nga Këshilli Bashkiak i Tiranës janë të pavërteta dhe se Veliaj është njoftuar në kohë për përgatitjen dhe nisjen drejt seancës gjyqësore.
Sipas njoftimit, mjetet e Policisë së Burgjeve kanë qenë të pranishme në ambientet e IEVP Durrës në orarin e parashikuar. Në momentin e njoftimit për transferim, Veliaj ka refuzuar të dalë, duke pretenduar se mjeti i Policisë së Burgjeve ishte vonuar.
Drejtoria e Përgjithshme e Burgjeve thekson se për çdo vonesë apo ndryshim orari, kancelaria e gjykatës njoftohet zyrtarisht dhe se nga ana e saj nuk ka pasur asnjë pengesë për zhvillimin normal të procesit gjyqësor.
“DEKLARATË PËR SHTYP
Në lidhje me reagimin e bërë në media nga Këshilli Bashkiak i Tiranës, Drejtoria e Përgjithshme e Burgjeve sqaron se janë të pavërteta pretendimet lidhur me orarin e transferimit të shtetasit Erion Veliaj nga IEVP Durrës drejt Gjykatës së Posaçme kundër Korrupsionit dhe Krimit të Organizuar.
Forcat e Policisë së Burgjeve, në varësi të Drejtorisë së Përgjithshme të Burgjeve, kanë njoftuar në kohë shtetasin E.V. për përgatitjen dhe nisjen drejt seancës gjyqësore. Mjetet e Policisë së Burgjeve kanë qenë të pranishme në ambientet e IEVP-së në kohën e parashikuar. Në momentin e njoftimit, shtetasi E.V. ka refuzuar të dalë, duke pretenduar se mjeti i Policisë së Burgjeve ishte vonuar.
Drejtoria e Përgjithshme e Burgjeve thekson se për çdo vonesë apo ndryshim orari, kancelaria e gjykatës njoftohet zyrtarisht dhe se nga ana jonë nuk ka pasur asnjë pengesë për zhvillimin normal të procesit gjyqësor”, theksohet në njoftimin zyrtar.
