Armando Broja, edhe në një prej periudhave më të vështira të karrierës, vazhdon të mbetet në qendër të vëmendjes.
Në ndeshjen ndaj Anglisë ai ishte sërish temë diskutimi për mediat britanike, për shkak të faktit se është pjesë e Premier League. Sulmuesi i Burnley u fut në fushë në minutën e 75-të dhe në ato minuta u shfaq i motivuar për të bërë paraqitje pozitive, edhe pse gjendja e tij psikologjike duket se nuk është në momentin më të mirë dhe mund të jetë duke ndikuar në performancën e tij.
Situata u përkeqësua më tej, pasi Broja nuk e mbylli dot ndeshjen. Ai u largua me barrelë, duke shtuar shqetësimet për një tjetër dëmtim fizik.
Top Channel ka mësuar se, për fat të mirë, ekzaminimet kanë rezultuar pozitive. Kontrollet e kryera pas ndeshjes kanë konfirmuar një ndrydhje të kaviljes, një dëmtim i lehtë që do ta mbajë sulmuesin jashtë fushës vetëm për disa ditë. Sipas të njëjtave burime, rikuperimi parashikohet brenda 4 deri në 5 ditë.
Kjo do të thotë se Broja pritet t’i rikthehet shpejt skuadrës së Burnley dhe të vijojë normalisht sezonin.
