Numri i rasteve të dhunës në familje në Gjirokastër është në rritje, duke nxjerrë në pah një problematikë të thelluar sociale. Sipas të dhënave të policisë lokale, gjatë këtij viti janë regjistruar 16 raste të dhunës në familje. Tre persona janë arrestuar, ndërsa 13 të tjerë janë proceduar në gjendje të lirë. Gjithashtu, janë paraqitur 33 kërkesa për urdhër mbrojtjeje.
Rritja e rasteve ka sjellë edhe një shtim të ndjeshëm të kërkesave për ndihmë psikologjike dhe asistencë ligjore. Klaudja Veizaj nga Qendra e Ndihmës Juridike Falas bëri të ditur se shumë nga rastet janë referuar nga Bashkia Gjirokastër, sektori i dhunës në familje, ndërsa qytetarët që kanë kërkuar urdhra mbrojtjeje janë asistuar nga kjo qendër.
“Qendra e ndihmës juridike të Shërbimit Parësor në Gjirokastër ka trajtuar raste të dhunës në familje, më së shumti kanë qenë raste të referuara nga Bashkia Gjirokastër, sektori i dhunës në familje. Qytetarët të cilët kanë paraqitur kërkesa për urdhër mbrojtje janë asistuar nga ana jonë”, deklaroi Veizaj.
Ajo shtoi se përveç dhunës midis bashkëshortëve, janë evidentuar edhe konflikte familjare midis vëllezërve dhe motrave. “Mundësitë e ulëta ekonomike për qytetarët, por edhe emigracioni, kanë ndikuar gjithashtu”, u shpreh ajo.
Fenomeni konsiderohet shqetësues dhe kërkon një angazhim më të gjerë të institucioneve publike dhe faktorëve shoqërorë për të adresuar shkaqet që çojnë në dhunë brenda familjes. Ndërkohë, sipas aktorëve lokalë, falë sensibilizimit në rritje, është shtuar edhe numri i denoncimeve në strukturat sociale dhe ligjzbatuese për ndëshkimin e autorëve.
