Aktor i njohur i humorit shqiptar, Rezart Veleshnja, ka dalë hapur në mbështetje të kandidatit për Bashkinë e Tiranës, Florjan Binaj, përpara zgjedhjeve të 9 nëntorit. Përmes një postimi në rrjetet sociale, Veleshnja ka bërë thirrje të fortë për qytetarët e Tiranës që të votojnë për mikun dhe kolegun e tij, duke e cilësuar këtë zgjedhje si një mundësi për të “shpëtuar kryeqytetin nga degradimi dhe për të rikthyer dinjitetin e qytetit”.
“Duhet ta votojmë Florin për të gjithë historinë e tij të jetës, për atë çfarë ai ka përfaqësuar në skenë dhe jashtë saj. Është një nga djemtë më të mirë që ka arti shqiptar. Shpëtoni Tiranën, mos e shisni votën!”, shkruan aktori në postimin e tij.
Veleshnja thekson se Binaj është shembulli i një qytetari të ndershëm, i një artisti që nuk është përlyer me pushtet apo interesa politike, por që ka fituar dashurinë e publikut me punën dhe integritetin e tij. “Ai nuk ka nevojë për pushtet për të qenë i dashur. Por sot Tirana ka nevojë për dikë si ai që e do qytetin, që njeh çdo rrugë dhe çdo njeri, që e di çfarë do të thotë të jesh një tironas i vërtetë,” shprehet Veleshnja.
Aktori bën thirrje që qytetarët të mos e shesin votën e tyre dhe të mos lejojnë që “interesat e ngushta” të shkatërrojnë të ardhmen e kryeqytetit. “Vota është arma jonë më e fortë. Me një votë mund të shpëtosh qytetin ku jeton. Mos e shisni votën për një thes me premtime. Votoni për të shpëtuar Tiranën,” shton ai.
Në postimin e tij, Veleshnja ka përmendur gjithashtu se të gjitha sondazhet e deritanishme tregojnë një mbështetje të gjerë për kandidatin e opozitës, Florjan Binaj, duke theksuar se “90 për qind e sondazheve e nxjerrin atë fitues ndaj rivalëve të tjerë”.
Kandidatura e Binajt, e mbështetur nga opozita, ka ngjallur interes të madh në opinionin publik, duke pasur parasysh figurën e tij të njohur nga televizioni dhe reputacionin si një nga aktorët më të dashur të brezit të tij. Fushata e tij ka marrë mbështetje nga shumë figura të njohura të artit dhe medias, të cilët e shohin si një simbol të qytetarisë, thjeshtësisë dhe ndershmërisë.
Zgjedhjet për Bashkinë e Tiranës do të zhvillohen më 9 nëntor, dhe gara pritet të jetë një nga më të ndjekurat e dekadës së fundit, me Florjan Binajn që shihet si alternativa që mund të sfidojë pushtetin aktual të bashkisë dhe të sjellë një frymë të re në drejtimin e kryeqytetit.
