Deklarata tronditëse e Gjovalin Shkëmbit, xhaxhait të autorit të vrasjes së gjyqtarit Astrit Kalaja, ka shkaktuar valë reagimesh dhe shqetësim të thellë në opinionin publik dhe në sistemin e drejtësisë. Në një intervistë ekskluzive për Euronews Albania, Gjovalini ka lëshuar një sërë kërcënimesh të hapura ndaj çdo gjyqtari që do të guxojë të dënojë nipin e tij, Elvis Shkëmbin, i cili ditën e djeshme ekzekutoi gjyqtarin brenda sallës së Gjykatës së Apelit në Tiranë.
“Kushdo qoftë ai gjyqtar që do ta dënojë nipin tim Elvisin, do përballet me të njëjtën gjë. Ai gjyqtar që do ta dënojë, do përballet me plumba! S’ka gjyqtar që guxon me e dënu Elvisin, sepse do pësojë si Astrit Kalaja. Ai gjyqtar që dënon ato me Kolin e Klisman e me mua ka të njëjtin shpërblim, provat i dhamë, s’na e përdhunon kush pronën. Nuk i druhem hakmarrjes hiç. Kush dënon atë djalë do përballet në gjykatë me plumba. Nuk ka gjyqtarë që e dënon, se do t’i hajë plumbat si Astrit Kalaja,” ka deklaruar me tone kërcënuese Gjovalini.
Në vijim të intervistës, ai ka pretenduar se familja e tij ka 13 vjet që përpiqet të marrë pronën e kontestuar në Shkodër dhe se, sipas tij, çdo proces gjyqësor është zvarritur padrejtësisht nga institucionet.
“Kemi 13 vjet që i shkruajmë kryeministrit dhe gjithë qeverisë: na jepni pronën, se e kemi ble. Ja kemi ble shtetit, me letra e me ligj. E kemi ble pronën me ligj, me rregulla. Kushdo që dënon atë djalë, të njëjtën gjë ka me pësu – qoftë edhe Donald Trump e Papa – nuk ka lojë me ne. Ashtu do përfundojnë. Ne i kemi fitu të gjitha gjyqet, e kemi certifikatën. Ka 13 vjet që i shkruaj kryeministrit: Më liro pronën, ta hetojë shteti! Nuk ka lojë më me ne. Nuk kam qenë në dijeni të veprimeve të nipit,” ka shtuar ai.
Në fund të intervistës, Gjovalini ka dërguar edhe një mesazh për familjen e gjyqtarit të ndjerë, duke kërkuar “falje”, por duke e shoqëruar sërish me një paralajmërim të errët:
“Familjes së ndjerit gjyqtar i ulemi në gjunjë, i kërkoj hallallin me kishë e me xhami. Por nëse e dënojnë atë djalë, ai do gjykohet siç u gjykua Astriti.”
Deklarata e tij, e mbushur me tone kërcënuese dhe armiqësore ndaj sistemit të drejtësisë, ka ngritur alarmin për sigurinë e gjyqtarëve dhe për gjendjen e tensionuar që ka përfshirë çështjen e pronësisë në Shkodër, e cila tashmë ka marrë përmasa të rënda kriminale.
Burime nga organet e hetimit bëjnë me dije se prokuroria ka nisur verifikimet për deklaratat e Gjovalin Shkëmbit, të cilat mund të përbëjnë vepër penale për nxitje të urrejtjes dhe kërcënim ndaj institucioneve të drejtësisë. Ndërkohë, autoritetet po hetojnë edhe lidhjet e mundshme të tij me çështjen që u bë shkak për vrasjen e gjyqtarit Astrit Kalaja, një ngjarje që ka ekspozuar në mënyrën më të dhimbshme dështimin e shtetit për të parandaluar shpërthimin e një konflikti që zvarritej prej vitesh.
