Një ngjarje e rëndë dhe skandaloze ka tronditur strukturat e rendit në Tiranë, ku një punonjës policie, i ngarkuar me detyrën për të garantuar sigurinë, u kap në flagrancë duke u marrë me veprimtari kriminale.
Agjencia e Mbikëqyrjes Policore (Rajoni Tiranë) ka arrestuar Inspektor M. L., i cili shërbente si trupë shërbimi në Bllokun e Sigurisë pranë Drejtorisë Vendore të Policisë Tiranë. Ky efektiv, i cili kishte për detyrë të ruante rendin dhe ligjin, dyshohet se shfrytëzonte uniformën dhe pozicionin e tij për të kryer veprime të paligjshme, duke blerë kokainë me qëllim tregtimin brenda ambienteve ku shërbente.
Sipas hetimeve, efektivi ishte në shënjestër të monitorimeve pas të dhënave konfidenciale që dispononte Drejtoria Rajonale e AMP-së. Pikërisht gjatë një takimi të organizuar për blerjen e disa dozave narkotike, ai u kap në flagrancë.
Në momentin e kontrollit fizik, policit iu gjet një dozë kokainë me peshë 0.4 gramë dhe 70 euro, të cilat u sekuestruan si prova materiale. Ajo që e bën edhe më tronditës këtë rast është fakti se droga dyshohet se do të shpërndahej në ambientet e vetë Bllokut të Sigurisë, një strukturë që simbolizon besimin e qytetarëve tek forcat e rendit.
Ngjarja ka ngritur alarmin për rrezikun e kriminalizimit të radhëve të policisë, ku një efektiv që supozohej të mbronte qytetarët, dyshohet se ishte kthyer vetë në shpërndarës droge.
Inspektori do të përballet me akuzat e rënda “Shpërdorim i detyrës”, “Prodhimi dhe shitja e narkotikëve” dhe “Moskallëzim i krimit”. Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndërsa hetimet për zbardhjen e plotë të skandalit vijojnë.
