Liverpool-i ka dhënë një shembull të rrallë humanizmi dhe respekti, duke vendosur që pas humbjes së rëndë të Diogo Jotës, familjes së tij t’i kalojë e gjithë shuma e mbetur e kontratës, plot 14.5 milionë paundë. Ky gjest i madh i klubit tregon se përtej futbollit, ekziston një lidhje njerëzore më e fortë.
Jota, i cili kishte edhe dy vite të mbetura nga kontrata deri në vitin 2027 dhe fitonte 140 mijë paundë në javë, nuk do të mund t’i shijonte ato ditë. Por pronarët e Fenway Sports Group vendosën ta nderojnë marrëveshjen deri në fund, duke i dhënë siguri financiare gruas dhe fëmijëve të tij.
Trajneri Arne Slot nuk i fshehu emocionet kur foli për këtë vendim: “Ndoshta njerëzit mendojnë se kjo është normale, por nuk është e zakonshme në botën e futbollit. Pronarët shpesh kritikohen, si trajnerët, por mënyra si e kanë menaxhuar këtë situatë është e jashtëzakonshme.”
Qyteti i Liverpool-it përjetoi ditë të rënda zie, ku tifozët u bashkuan në memoriale, duke vendosur lule e mesazhe pranë stadiumit. Slot shtoi me emocion: “Dhimbja ishte e madhe, por ajo që më tronditi ishte dashuria e pafundme e tifozëve. Shpesh mendoj: si ndihen tani gruaja dhe fëmijët e tij?”.
Klubi, përveç ndihmës financiare, vendosi të tërheqë përgjithmonë fanellën me numrin 20, si një kujtim i përjetshëm për Jotën. Kryetari i klubit, Tom Werner, e përshkroi si një njeri unik: “Nuk ishte i dashur vetëm sepse shënonte gola – ishte i dashur sepse ishte sinqerisht një njeri i mirë.”
Solidariteti kaloi edhe kufijtë e rivalitetit sportiv. Futbollistët e Chelsea-t dhuruan një pjesë të shpërblimit prej 11.4 milionë paundësh nga Kupa e Botës për Klube për familjen e Jotës, një veprim që preku jo vetëm komunitetin futbollistik, por gjithë opinionin publik.
Një histori e dhimbshme, por edhe një kujtim i fortë se futbolli nuk është vetëm lojë: është njerëzi, solidaritet dhe dashuri që nuk shuhet kurrë.
