Kanë kaluar tre vite nga ngjarja e rëndë e 13 gushtit 2022, kur studentja 22-vjeçare nga Kenia, Joy Aoko, humbi jetën në rrethana misterioze pranë Qytetit Studenti në Tiranë. Ende sot, autoritetet shqiptare nuk kanë zbardhur se kush është përgjegjës për vdekjen e saj. Prokuroria e Tiranës po shkon drejt pezullimit të çështjes për mungesë provash.
Burime për A2 CNN bëjnë të ditur se policia shqiptare ka neglizhuar marrjen e provave nga vendngjarja. Ndërkohë, për dy vite rresht autoritetet keniane nuk i kanë kthyer përgjigje letër-porosive të dërguara nga Shqipëria për të marrë skedën zyrtare të vdekjes së Joy-t.
Nëna e saj, Ruth Abongo, thotë se nuk do të ndalet derisa të gjendet fajtori. Në një intervistë për A2 CNN, ajo u shpreh se e di kush e vrau vajzën dhe se edhe policia shqiptare është në dijeni.
“Unë e di kush e vrau fëmijën tim. Edhe policia e di. Jam shumë e zhgënjyer nga drejtësia në Shqipëri. Ishte dhimbje e madhe për mua, por tani jam bërë më e fortë dhe kam forcën për t’u përballur me frikërat e mia, përfshirë kthimin në Shqipëri. Po, do të vij për ta mbyllur çështjen dhe për t’ia marrë telefonin nga gjykata. Me këshillat e duhura do të vij, por këtë herë do të sigurohem që kam vizituar personalisht zyrat në Kenia”, deklaroi ajo.
Joy u gjet e plagosur rëndë më 14 gusht, rreth mesditës, në oborrin e një banese pranë shtëpisë ku jetonte me disa shoqe nga Kenia. E reja punonte në një kazino në Tiranë dhe jetonte në kryeqytet prej disa kohësh. Pas ngjarjes, ajo u transferua në Spitalin e Traumës, ku qëndroi në gjysmë-koma, më pas u dërgua për kurim në Kenia, por ndërroi jetë në spitalin Kenyatta.
Policia shqiptare nuk e raportoi ngjarjen menjëherë, duke tentuar ta mbajë të fshehtë. Vetëm pas tre muajsh, rasti i Joy Aoko-s u bë publik, por edhe sot, pas tre vitesh, mbetet i pasqaruar.
