Një ngjarje e rëndë dhe skandaloze ka tronditur opinionin publik në Këlcyrë dhe më gjerë. Një punonjës policie, 56-vjeçari Artur Ago, me detyrë në Policinë e Përmetit, dyshohet se ka pasur një lidhje intime me një vajzë vetëm 16 vjeçe. Rasti ka dalë në dritë pas publikimit në rrjetet sociale të disa materialeve komprometuese që zbuluan përfshirjen e efektivit në këtë histori, duke shkaktuar një reagim të menjëhershëm të institucioneve.
Hetimet janë marrë në dorë nga Drejtoria Vendore e Policisë Gjirokastër në bashkëpunim me Agjencinë e Mbikëqyrjes Policore (AMP). Burime hetimore bëjnë me dije se çështja lidhet me disa video me përmbajtje intime, ku protagoniste është e mitura, të cilat kanë përfunduar në duart e disa të rinjve, shokë të saj. Pikërisht këta të rinj dyshohet se kanë tentuar të përdorin materialet për ta shantazhuar policin, duke i kërkuar shuma parash në këmbim të mospublikimit të videove.
Ngjarja ka marrë përmasa alarmante pasi videot janë shpërndarë virtualisht dhe kanë kaluar nga duar në duar, duke u bërë element kyc i shantazhit. Ky fakt jo vetëm ka tronditur familjen e të miturës, por ka ngjallur edhe indinjatë të thellë tek komuniteti, duke ngritur pyetje të rënda mbi moralin dhe integritetin e një punonjësi të shtetit që kishte për detyrë të mbronte qytetarët.
Deri tani, policia ka shoqëruar shtatë persona që dyshohet se kanë pasur rol në shpërndarjen dhe shantazhin e efektivit. Hetuesit po përpiqen të zbardhin me detaje të plota zinxhirin e ngjarjes, për të përcaktuar se kush ka pasur akses në videot dhe kush ka ushtruar presion financiar mbi punonjësin e policisë.
AMP ka marrë në dorë rastin dhe po ndjek procedurat ndaj policit të dyshuar, i cili tashmë është nën hetim për një vepër penale të rëndë që prek drejtpërdrejt jo vetëm reputacionin e Policisë së Shtetit, por edhe besimin e qytetarëve tek institucionet ligjzbatuese.
Ky skandal pritet të ketë pasoja të rënda, pasi ngre shqetësime të thella mbi abuzimin e mundshëm të një personi në uniformë me detyrën, si dhe mbi rrezikun që i kanoset të miturve nga raste të tilla. Opinioni publik kërkon një hetim të plotë dhe ndëshkim shembullor për të gjithë të përfshirët, si për efektivin e policisë, ashtu edhe për ata që përdorën videot intime si mjet shantazhi.
Institucionet janë vënë nën presion të madh për të reaguar me transparencë dhe për të garantuar se drejtësia do të vihet në vend në një çështje kaq të ndjeshme dhe të rëndë, ku viktimë është një vajzë e mitur dhe fajtorë janë ata që në vend të mbrojtjes, kanë abuzuar me besimin dhe ligjin.
