Shoqata e Gjyqtarëve të Shqipërisë ka reaguar me tone të forta ndaj deklaratave të kryeministrit Edi Rama kundër gjyqtarit të Gjykatës Administrative të Shkallës së Parë Tiranë, Marko Boshku, i cili kishte vendosur kundër një shkarkimi të bërë nga qeveria. Organizata i cilësoi këto sulme si një akt të paligjshëm dhe të rrezikshëm për pavarësinë e drejtësisë.
Në deklaratën e saj, Shoqata thekson:
“Sulmi ndaj gjyqtarit të Gjykatës Administrative të Shkallës së Parë Tiranë, Marko Boshku, pasi i dha të drejtë një zyrtari të shkarkuar nga qeveria, është një tentativë e paprecedentë për uzurpimin e sistemit të gjyqësorit. Shoqata do të ndjekë rrugë ligjore për mbrojtjen e gjyqtarit dhe të pavarësisë së drejtësisë.”
Shoqata i kujtoi qeverisë se sulmet e tilla janë të papranueshme në një vend demokratik:
“I kujtojmë përfaqësuesit më të lartë të pushtetit ekzekutiv se çdo deklaratë denigruese në drejtim të gjyqtarëve përbën ndërhyrje në veprimtarinë e tyre dhe se, referuar nenit 145, pika 3, të Kushtetutës së Republikës së Shqipërisë, një veprim i tillë sjell përgjegjësi sipas ligjit. Postime dhe komente si ai që është bërë ndaj gjyqtarit Marko Boshku janë në kufijtë e veprës penale dhe, si të tilla, do të monitorohen nga kjo Shoqatë, duke përcaktuar hapat që do të ndërmerren në çdo rast.”
Shoqata e Gjyqtarëve i bëri thirrje edhe Këshillit të Lartë Gjyqësor të marrë një qëndrim më të prerë në mbrojtje të gjyqtarëve dhe paralajmëroi pasoja të rënda për proceset integruese të Shqipërisë:
“Sulmi ndaj një pushteti tjetër jo vetëm që e minon këtë parim gurthemel të Kushtetutës sonë, por është shprehje e një mentaliteti që i përket një regjimi tjetër. Ky sulm nuk është vetëm një tentativë për uzurpimin e këtij pushteti, por mund të ketë pasoja serioze në procesin e integrimit në Bashkimin Evropian.”
Në fund, Shoqata kërkoi mbështetje nga ndërkombëtarët:
“U bëjmë thirrje gjithë partnerëve tanë ndërkombëtarë për të mbështetur pa rezerva sistemin e reformuar të drejtësisë, i cili është më së pari produkt i ndihmës së tyre të pakursyer, si dhe të bëjnë të mundur që zëri i tyre në këtë drejtim të dëgjohet nga ata që u ka humbur kjo shqisë në raport me aktorët e brendshëm.”
