Banorët e Martaneshit, në rrethin e Bulqizës, kanë protestuar kundër devijimit të ujit të liqenit të Sopes, një burim natyror që prej shekujsh u ka shërbyer fshatrave të zonës për jetesë. Ata e konsiderojnë ndërhyrjen si një rrezik serioz për ekzistencën e komunitetit, duke e cilësuar ujin e Sopes si “arterien kryesore të jetës” për këtë krahinë malore.
Sipas banorëve, kompania “Teodori 2003” po devijon rrjedhën e ujit për të prodhuar energji elektrike në një hidrocentral të ri në njësinë administrative të Zerqanit. Ky proces, sipas tyre, pritet të lërë pa ujë të pijshëm dhe për ujitje pesë fshatra të Martaneshit, duke prekur drejtpërdrejt mbi 2 mijë banorë.
Në protestë, qytetarët ngritën shqetësimin se pa këtë burim natyror, jeta e tyre bëhet e pamundur. “Pa ujin e Sopes nuk ka bujqësi, nuk ka blegtori, nuk ka jetë. Është krim të na e marrin ujin për ta kthyer në fitim për pak njerëz,” u shprehën disa prej protestuesve. Ata e cilësuan ndërhyrjen si një krim mjedisor dhe social, që jo vetëm dëmton banorët, por rrezikon edhe ekosistemin e liqenit dhe faunën e zonës.
Martaneshi është një nga zonat më të varfra të Bulqizës, ku banorët jetojnë kryesisht nga bujqësia dhe blegtoria. Uji i Sopes shfrytëzohet jo vetëm për të pirë dhe për vaditje, por edhe për jetën e bagëtive, që janë baza kryesore e ekonomisë lokale. Humbja e këtij burimi, sipas tyre, do të sillte pasoja të pariparueshme dhe braktisje të detyruar të fshatrave.
Banorët paralajmëruan se nuk do të ndalen vetëm me këtë protestë, por do të përshkallëzojnë veprimet e tyre deri në mbrojtjen e plotë të të drejtës mbi ujin. “Ky është fillimi. Nëse nuk dëgjohemi, do të vazhdojmë me protesta më të mëdha dhe do të kërkojmë drejtësi në çdo instancë. Ne nuk po mbrojmë vetëm veten, por të ardhmen e fshatrave tona,” thanë ata.
Ata i kërkojnë institucioneve qendrore dhe vendore të ndërhyjnë urgjentisht për të ndalur projektin, duke theksuar se liqeni i Sopes nuk është thjesht një burim uji, por një pasuri e patjetërsueshme e zonës dhe pjesë e trashëgimisë natyrore që u përket brezave.
