Një varr monumental i periudhës romake është zbuluar në fshatin Strikçan të Bulqizës, në zonën e njohur si “Fusha e Gurrës”. Sipas arkeologëve, struktura daton mes shekujve III-IV pas Krishtit dhe përfaqëson një nga zbulimet më të rëndësishme të viteve të fundit në trojet shqiptare.
Matjet paraprake tregojnë se varri ka përmasa të mëdha, me gjatësi deri në 9 metra dhe gjerësi 5 metra. Ai përbëhet nga dy dhoma: një paradhomë dhe dhoma funerale, me hyrjen e realizuar përmes një shkalle të ndërtuar posaçërisht. Ekspertët theksojnë se ky është i pari varr i këtij lloji i zbuluar ndonjëherë në Shqipëri, duke hedhur dritë mbi organizimin dhe ritin funeral të prijësve të lashtë.
Në dhomën funerale janë gjetur mbetje kockore, enë qelqi të formave dhe madhësive të ndryshme, një krehër prej kocke, thika të improvizuara dhe fragmente tekstilesh, të cilat kanë arritur t’i mbijetojnë kohës. Arkeologët do t’i nënshtrojnë të gjitha këto objekte analizave të specializuara për të ndërtuar një interpretim më të plotë mbi jetën dhe statusin e individit të varrosur.
Po ashtu, në muret e varrit janë zbuluar mbishkrime me disa rreshta, ku mendohet se përmenden emra. Deshifrimi i tyre pritet të ofrojë të dhëna të reja mbi përkatësinë, identitetin dhe ndoshta edhe mesazhin simbolik të këtij varrimi monumental.
Ky zbulim përfaqëson një dëshmi të çmuar të historisë së hershme në trevat shqiptare, duke hapur mundësi të reja për studime arkeologjike dhe historike mbi periudhën romake në Ballkan.
