Australia ka miratuar një ligj të ri që ndalon përdorimin e mediave sociale për fëmijët nën moshën 16 vjeç, i cili pritet të hyjë në fuqi në dhjetor. Platformat kryesore si Facebook, Instagram, Snapchat dhe YouTube do të jenë të detyruara të ndërmarrin “hapa të arsyeshëm” për të parandaluar të miturit të hapin apo përdorin llogari. Shkelja e këtyre rregullave do të shoqërohet me gjoba që mund të arrijnë deri në 50 milionë dollarë australianë.
Megjithatë, një raport i Skemës së Certifikimit të Kontrollit të Moshës ngre shqetësime serioze mbi mënyrën se si do të verifikohet mosha e përdoruesve. Sipas raportit, përdorimi i dokumenteve zyrtare mbetet metoda më e saktë, por sjell rrezik për privatësinë dhe ruajtjen e të dhënave personale. Po ashtu, teknologjia e njohjes së fytyrës rezultoi problematike, pasi doli e pasaktë për adoleshentët pranë moshës kufi, duke rrezikuar bllokimin e përdoruesve të ligjshëm ose lejimin e fëmijëve më të vegjël.
Ministrja e Komunikacionit, Anika Wells, theksoi se nuk ekziston një zgjidhje e vetme, por u bëri thirrje kompanive të teknologjisë të shfrytëzojnë mjetet që kanë për të mbrojtur të miturit. “Është e arsyeshme që këto kompani, të cilat janë në pararojë të inteligjencës artificiale, të garantojnë që fëmijët të jenë të sigurt në internet,” tha Wells.
Edhe pse sondazhet tregojnë se shumica e australianëve mbështesin këtë ndalim, ekspertët e shëndetit mendor kanë paralajmëruar se masa mund të sjellë pasoja të padëshiruara, duke izoluar fëmijët nga lidhjet sociale ose duke i shtyrë drejt platformave të tjera të rrezikshme dhe të parregulluara online.
