Një aksident i rëndë ka tronditur sot autostradën Egnatia në lindje të Greqisë, ku tre shtetas shqiptarë kanë humbur jetën dhe një tjetër është plagosur rëndë. Ngjarja ndodhi rreth orës 13:00 pranë pikës së pagesës Iasmos, në kilometrin 537.5 të autostradës, në zonën e Komotinisë.
Sipas raportimeve, një kamion është përplasur me dy automjete, ku një prej tyre, me targa greke, ku udhëtonin katër shqiptarë, u përfshi menjëherë nga flakët. Brenda pak sekondash makina u shkrumbua, duke mos u lënë asnjë shans tre prej pasagjerëve që ndodheshin brenda. Viktimat kanë ndërruar jetë në vend, ndërsa një grua 49-vjeçare ka arritur të nxirret nga kalimtarët dhe është transportuar në spital në gjendje të rëndë.
Viktimat janë identifikuar si:
Viktor Bushi, 59 vjeç, banues në Metamorfosi, Athinë
Klarenc Kacaj, 61 vjeç, banues në Dhrapecona, Athinë
Marianka Bushi Aliraj, 57 vjeçe
E plagosura është Mardalena Kacaj, 49 vjeçe, e cila ndodhej në sediljen pas shoferit dhe u shpëtua nga kalimtarët e rastit.
Mediat greke, përfshirë “Protothema”, raportojnë se viktimat u karbonizuan brenda mjetit të tyre. Sipas informacioneve, automjeti ishte ndalur për të kryer pagesën në pikën e Iasmos kur u godit fuqishëm nga kamioni që vinte pas, duke u përfshirë menjëherë nga flakët.
Autoritetet greke po hetojnë shkaqet e aksidentit, ndërsa pamjet nga vendngjarja tregojnë dimensionin tragjik të ngjarjes që u mori jetën tre shqiptarëve.
