Policia e Tiranës ka vënë në pranga dy të mitur, 17-vjeçarë, të cilët u kapën në flagrancë në Vorë, sapo dolën nga një degë postare ku kishin marrë një paketë të ardhur nga Shtetet e Bashkuara të Amerikës. Brenda paketës u gjetën 1 kilogram e 118 gramë kanabis sativa me përqindje të lartë THC.
Në kuadër të operacionit policor të koduar “Pako 6”, përveç këtyre dy të rinjve të arrestuar, është shpallur në kërkim edhe një person tjetër i përfshirë në këtë rrjet, identiteti i të cilit mbahet i fshehtë pasi hetimet vazhdojnë.
Të dy 17-vjeçarët akuzohen për trafik droge përmes postës, duke sjellë lëndën narkotike nga SHBA me qëllim tregtimin në Shqipëri.
Policia vijon punën intensive për të identifikuar dhe arrestuar porositësit e drogës, si dhe për të mbledhur prova të plota ligjore për këtë ngjarje.
Njoftimi i policisë
“Në vijim të aksioneve të pandërprera për goditjen e rasteve të trafikimit të lëndëve narkotike të trafikuara nga jashtë vendit për shitje në tregun vendas, Seksioni për Hetimin e Narkotikëve, nën drejtimin e Prokurorisë, në bashkëpunim me Komisariatin e Policisë Rinas dhe Filialin “Qendra Tranzite” të Postës Shqiptare, finalizoi operacionin e koduar “Pako 6”.
Gjatë operacionit u arrestuan në flagrancë dy 17-vjeçarë, të cilët u kapën menjëherë pasi morën në një degë postare në Vorë një pako me 1 kg e 118 gramë Cannabis Sativa me përqindje të lartë THC, të trafikuar nga SHBA me qëllim shitjen në Shqipëri.
Gjithashtu, u shpall në kërkim një tjetër shtetas i përfshirë në këtë aktivitet, gjeneralitetet e të cilit nuk bëhen publike për shkak se hetimet vijojnë.
Punohet për identifikimin dhe kapjen e porositësve të lëndës narkotike, si dhe për dokumentimin e plotë ligjor të ngjarjes.
Materialet procedurale i janë referuar Prokurorisë së Tiranës për veprime të mëtejshme”. thuhet në njoftim.
