Në orët e para të mëngjesit, një zjarr i fuqishëm shpërtheu në Kefaloni, por tashmë është vënë nën kontroll, sipas presidentit të Komunitetit të Faraklatës, Evangelos Marinakis, i cili foli për ERT News mbi përpjekjet për shuarjen e tij.
“Sot, situata është e qëndrueshme. Ka vetëm disa rikthime të vogla të flakëve, të cilat po mbikëqyren nga zjarrfikësit. Nuk ka arsye për shqetësim”, deklaroi Marinakis.
Ai sqaroi se zjarri nisi rreth orës 02:20 të mëngjesit, në një zonë të vështirë malore me bimësi të ulët. Pavarësisht përhapjes së shpejtë dhe erërave të forta, nuk ka pasur rrezik për zonat e banuara, falë reagimit të menjëhershëm të forcave tokësore.
Flakët shpërthyen mes fshatrave Faraklata dhe Prokopata, duke detyruar autoritetet të dërgojnë një njoftim emergjent përmes sistemit 112. Ndërhyrja vendimtare e zjarrfikësve në terren parandaloi avancimin e zjarrit drejt zonave të populluara.
Sipas Marinakis, kushtet atmosferike dhe përdorimi i mjeteve ajrore kanë ndihmuar në menaxhimin e situatës, duke e çuar zjarrin drejt shuarjes së plotë.
“Jemi në një fazë shumë të mirë, por zjarrfikësit dhe vullnetarët do të qëndrojnë në terren për të parandaluar çdo rikthim”, tha ai.
Zjarri shpërtheu pranë nënstacionit qendror të energjisë së PPC-së, por pa e dëmtuar atë. Megjithatë, për arsye sigurie, u regjistruan ndërprerje të përkohshme të energjisë në pjesën qendrore të ishullit, të cilat po rikthehen gradualisht.
