Në kulmin e një vale të nxehti me temperatura që arrijnë deri në 38°C, qyteti bregdetar i Sarandës po përballet me një mungesë të rëndë të furnizimit me ujë të pijshëm, që ka goditur disa lagje kryesore dhe po dëmton rëndë jetesën e banorëve, si dhe reputacionin turistik të qytetit.
Lagjja nr. 3 (rruga “Gjergj Arianiti”), lagjja nr. 4 në Kodër, rruga e Bashkisë dhe rruga e 5-të janë zonat më të prekura, ku banorët denoncojnë mungesën e ujit nga rubinetat prej më shumë se gjashtë ditësh.
Ndërkohë, qyteti është mbushur me turistë dhe kërkesa për shërbime bazë është në pikun më të lartë të vitit.
Banorët kanë hedhur akuza të rënda ndaj drejtorit të ujësjellësit, Amardo Goxharaj, dhe përgjegjësit lokal për Sarandën, Alban Alikaj, të cilët sipas tyre favorizojnë hotelet private duke u siguruar furnizim të pandërprerë në këmbim të pagesave të paligjshme, ndërkohë që banorët mbeten pa ujë edhe për nevojat më elementare.
“Jemi detyruar të mbushim ujë me bote, nuk kemi si të lahemi, si të gatuajmë. Ndërkohë, hotelet e mëdha kanë ujë pa ndërprerje,” – shprehet një banore e lagjes nr. 4.
Qytetarët kërkojnë masa urgjente për rikthimin e furnizimit të ujit në mënyrë të barabartë dhe të drejtë, duke theksuar se çdo vonesë është e papranueshme dhe e dëmshme.
Ata paralajmërojnë se kjo krizë po dëmton rëndë sektorin turistik, që përbën shtyllën kryesore të ekonomisë lokale. Turistë të huaj janë ankuar për mungesën e ujit në hotele dhe apartamente, duke u përballur me një realitet që është larg standardeve europiane të pritshme.
Megjithatë, në kulmin e kësaj krize, as Bashkia e Sarandës dhe as ndërmarrja e ujësjellësit nuk kanë ndërmarrë asnjë hap konkret për të përmirësuar situatën.
Ky nuk është rasti i parë që Saranda përballet me mungesë ujë në sezonin turistik, por paaftësia dhe mungesa e përgjegjshmërisë këtë vit kanë shkaktuar revoltë dhe zemërim të thellë tek banorët.
