Tre persona janë arrestuar nga Policia e Shkodrës në lidhje me dy ngjarje të dhunshme të ndodhura në zona të ndryshme të qarkut, të dyshuara si pasojë e konflikteve për motive të dobëta. Të plagosurit ndodhen në spital dhe fatmirësisht janë jashtë rrezikut për jetën.
Ngjarja e parë është shënuar në lagjen “Tre Heronjtë” të qytetit të Shkodrës, ku dy vëllezër, B. B., 38 vjeç, dhe B. B., 41 vjeç, janë arrestuar nga Specialistët për Hetimin e Krimeve ndaj Personit. Sipas policisë, ata dyshohet se kanë plagosur rëndë një 42-vjeçar duke përdorur sende të forta dhe një armë të ftohtë. Viktima ndodhet nën kujdesin e mjekëve, ndërsa thika e përdorur në ngjarje është sekuestruar si provë materiale. Vëllezërit akuzohen për veprat penale “Plagosja e rëndë me dashje” dhe “Mbajtja pa leje e armëve të ftohta”.
Ngjarja e dytë ka ndodhur në fshatin Nderlysaj të Thethit, ku policia ka arrestuar 25-vjeçarin F. Th., i cili dyshohet se ka plagosur me thikë një 28-vjeçar pas një konflikti për motive të dobëta. Edhe në këtë rast, i plagosuri ndodhet jashtë rrezikut për jetën, ndërsa arma e krimit është sekuestruar nga autoritetet.
Materialet për të dyja rastet janë referuar në Prokurori për veprime të mëtejshme ligjore.
