Nga hetimet e SPAK ndaj Erion Veliajt dhe bashkëpunëtorëve të tij janë zbuluar të tjera skema përfitimesh për familjarët e kryebashkiakut të Tiranës. Sipas të dhënave të publikuara nga Ora News, përfitues i drejtpërdrejtë i këtyre skemave ka qenë edhe vëllai i Veliajt, Arbi Veliaj.
Ai ka porositur një njësi në godinën “Bookbuilding”, pranë Sahatit të Tiranës, e ndërtuar nga kompania TDT & Partners. Pronari i firmës, Gledi Abdi, ka deklaruar se kontrata është lidhur që para një viti, por asnjë pagesë nuk është kryer ende nga ana e Arbit.
SPAK ka këqyrur kontratat e porosisë të lidhura me shoqërinë Invest Society Shpk, konkretisht për dy objekte: “Rainbow” me Leje Zhvillimore “Godinë Polifunksionale Europiane Blloku” dhe “Godinë Polifunksionale West Residence”.
Në objektin “Rainbow”, Arbi Veliaj, nëpërmjet kompanisë së tij Gogel Shpk, ka porositur një njësi/zyrë në katin e tretë të objektit, me sipërfaqe ndërtimore totale 451.9 m² (379.75 m² sipërfaqe neto dhe 72.15 m² sipërfaqe e përbashkët). Çmimi i blerjes është përcaktuar për të 1,800 euro për metër katror, (megjithëse asokohe dyshemeja e këtij çmimi ishte 5,000 euro për metër katror) duke e çuar shumën totale në 813,420 euro.
Pagesa do të kryhej me tre këste:
300,000 euro menjëherë pas lidhjes së kontratës
300,000 euro brenda 45 ditëve nga nënshkrimi i kontratës
213,420 euro brenda 90 ditëve nga nënshkrimi i kontratës
Po ashtu, është lidhur një kontratë për prenotimin e një garazhi në bodrumin e godinës, për të cilin çmimi i blerjes është 20,000 euro dhe duhet të likuidohet brenda dy muajsh në llogarinë bankare të shoqërisë Invest Society.
Më 3 tetor 2023, Gogel Shpk, përfaqësuar nga Arbi Veliaj, i ka shitur të drejtat reale për njësinë e porositur te Gogel Holdings Shpk, e përfaqësuar nga bashkëshortja e tij, Ana Xhoxhaj. Kontrata është nënshkruar me dakordësinë e shoqërive Invest Society Shpk dhe TDT&Partners Shpk.
Sipas përmbajtjes së kontratës, detyrimet e papaguara ndaj shoqërisë Invest Society në momentin e nënshkrimit arrijnë në 133,420 euro. Çmimi total për kalimin e të drejtave reale është 833,420 euro, nga të cilat:
133,420 euro do të kalojnë në llogarinë e Invest Society si detyrim i pashlyer
700,000 euro do të paguhen Gogel Shpk përmes fitimeve të pashpërndara të Gogel Holdings Shpk, në formën e dividentëve pas miratimit nga Asambleja e Ortakëve.
