Gjykata e Posaçme Kundër Korrupsionit dhe Krimit të Organizuar ka vendosur të lërë në fuqi masën e arrestit me burg për Burim Ferizajn dhe Përparim Kalbajn, të dyshuar për përfshirje në një rrjet kriminal që ka futur miliona euro në Shqipëri nga Zvicra, duke përdorur sistemin informal të transferimit të parave, të njohur si “Hawala”.
Sipas hetimeve të Prokurorisë së Posaçme, ky sistem, që funksionon pa lënë gjurmë të dokumentuara, aplikohet me një tarifë prej rreth 6% të shumës së transferuar dhe përdor si mbulesë biznese të ligjshme si zyrat e këmbimit valutor dhe agjencitë turistike për të realizuar lëvizjen e parave.
Në kuadër të këtij hetimi, autoritetet zvicerane kanë ndaluar edhe shtetasin Ervis Ferizaj, që dyshohet të jetë pjesë e të njëjtit rrjet.
Të dhënat e deritanishme tregojnë se paratë janë transferuar nga Zvicra drejt Shqipërisë përmes këtij mekanizmi të padokumentuar që nga viti 2020 e në vazhdim.
SPAK akuzon Burim Ferizajn dhe Përparim Kalbajn për krijim të një grupi të strukturuar kriminal dhe trafik droge.
Arrestimi i tyre u krye me urdhër të posaçëm të SPAK, ndërkohë që hetimet përfshijnë edhe pista të tjera të lidhura me aktivitetin ndërkombëtar të pastrimit të parave.
