Zjarri në malin e Dukatit në Vlorë vijon të jetë aktiv prej disa ditësh, ndërsa përpjekjet për shuarjen e tij po vazhdojnë nga toka, pavarësisht terrenit të vështirë.
Në vendngjarje janë angazhuar 17 mjete zjarrfikëse, 30 trupa të Forcave të Armatosura, si dhe punonjës të Emergjencave Civile të Vlorës dhe shërbimit pyjor.
Forcat po punojnë për të lokalizuar flakët dhe për të parandaluar përhapjen e tyre drejt Parkut Kombëtar të Llogarasë.
Në varësi të zhvillimit të situatës, parashikohet edhe një ndërhyrje nga ajri.
Ndërkohë, një tjetër vatër zjarri është aktive në fshatin Vernik të Devollit. Prefektura e Korçës njofton se intensiteti i flakëve ka rënë që prej mbrëmjes së kaluar, duke shmangur përhapjen drejt zonës kufitare. Po shqyrtohet gjithashtu mundësia për ndihmë nga pala greke në formë ndërhyrjeje ajrore.
