Një shpërthim me tritol ka tronditur orët e para të mëngjesit në Rrugën e Durrësit në Tiranë.
Rreth orës 03:45, një sasi lënde plasëse është vendosur pranë hyrjes së një lokali në pronësi të Arbër Sinanit.
Fatmirësisht, nga shpërthimi nuk ka persona të lënduar, por dëmet materiale janë të konsiderueshme.
Sinani ka deklaruar para hetuesve se nuk ka dijeni për ndonjë konflikt personal apo kërcënim të mëparshëm dhe se nuk e di kush mund të jetë autori i vendosjes së tritolit.
Megjithatë, burime pranë grupit hetimor bëjnë me dije se ai më parë ka jetuar për një periudhë në Gjermani, ku dyshohet se mund të ketë pasur përfshirje në aktivitet të paligjshëm me lëndë narkotike.
Kjo ka ngritur dyshime se shpërthimi mund të lidhet me konflikte të mëparshme për çështje droge jashtë vendit.
Kamerat e sigurisë në ambientet e lokalit rezultojnë të jenë jo funksionale, pasi nuk janë të pajisura me sistem DVR, çka ka vështirësuar hetimin.
Policia ka sekuestruar pamje nga kamerat e sigurisë së bizneseve përreth, ndërsa vijojnë hetimet për identifikimin e autorëve dhe zbardhjen e plotë të ngjarjes.
