Ministria e Mbrojtjes njofton se në 24 orët e fundit janë evidentuar 22 vatra zjarri në disa zona të vendit, nga të cilat 5 mbeten ende aktive dhe 1 është nën monitorim.
Vatrat janë përhapur në bashkitë Dibër, Bulqizë, Rrogozhinë, Kavajë, Vlorë, Himarë, Selenicë, Librazhd, Malësi e Madhe, Mallakastër dhe Mirditë.
Një nga vatrat më problematike është ajo në zonën “Liqeni i Luleve”, pjesë e Parkut Kombëtar të Lurës, ku zjarri ka përfshirë një sipërfaqe pyjore me pisha dhe livadh.
Po ashtu, në bashkinë Bulqizë është riaktivizuar vatra në “Mali i Peladhisë”, në njësinë administrative Zerqan. Flakët janë përhapur në drejtim të “Majës së Vlashës” dhe janë ndihmuar nga temperaturat e larta dhe era, duke krijuar dy vatra aktive.
Në terren ndodhen 8 efektivë të Shërbimit Vendor të MZSH, të cilët po përpiqen ta vënë situatën nën kontroll. Deri tani nuk raportohet për rrezik ndaj banesave.
Në Dibër, konkretisht në fshatin Sinë e Sipërme, njësia administrative Arras, ka rënë zjarr në një pyll me dushk, duke djegur rreth 4 hektarë sipërfaqe. Në terren ndodhen forcat e MZSH Dibër me 5 efektivë dhe 6 punonjës bashkiakë, të cilët po punojnë me mjete rrethanore dhe pompa shpine në një terren të vështirë.
Situata më e rënduar është shënuar në fshatin Zambishë, ku flakët janë përhapur me shpejtësi edhe në fshatrat përreth si Okshtun, Levonje, Himenrajë, Memollaj, Thertor, Koçaj, Sheshaj dhe Brendaj. Mbrëmjen e djeshme, zjarri mori përmasa të mëdha sidomos në Thartor, Sheshaj, Prendaj dhe Dakaj, duke kërkuar ndërhyrje nga ajri me dy helikopterë të Forcave të Armatosura. Ndërhyrja ajrore ndihmoi në neutralizimin e disa vatrave që rrezikonin banesat, ullishtet dhe pyjet me pisha.
Ndërkohë, në fshatin Drenovë, njësia administrative Qendër Dukas në Mallakastër, ka shpërthyer një zjarr në një sipërfaqe me shkurre dhe ferra, duke djegur rreth 2.5 hektarë tokë dhe afro 250 rrënjë ullinj.
Edhe pse flakët ishin shuar, një vatër është riaktivizuar sot, ku forcat e MZSH-së dhe të bashkisë po vijojnë punën me mjete të thjeshta dhe pompa shpine për ta mbajtur nën kontroll situatën.
