Një tjetër rast abuzimi me detyrën është zbuluar në radhët e Policisë së Shtetit. Nënkomisari Edison Pema, me detyrë në Seksionin për Hetimin e Narkotikëve në Drejtorinë Vendore të Policisë Elbasan, është arrestuar nga Agjencia e Mbikëqyrjes Policore në kuadër të operacionit “Last Rent”, zhvilluar në bashkëpunim me Prokurorinë e Elbasanit.
Hetimet zbuluan se Pema ushtronte aktivitet të paligjshëm duke dhënë para me fajde për persona të ndryshëm, të cilët më pas i detyronte me kanosje dhe dhunë të kthenin shuma të mëdha parash.
Në një prej rasteve të dokumentuara, ai i kishte dhënë një shtetasi një shumë prej 50 mijë euro, duke i marrë çdo muaj nga 2 mijë euro si interes.
Përveç interesave të majme, nënkomisari i kishte marrë të njëjtit person edhe pesë automjete, të cilat i mbante peng nën presion të vazhdueshëm.
Pas kallëzimit të bërë nga qytetari dhe verifikimeve të kryera nga AMP, pretendimet u faktuan dhe Pema u vu në pranga.
Rasti ngre edhe një herë shqetësimin për përfshirjen e punonjësve të rendit në aktivitete të paligjshme, duke cënuar rëndë besimin e publikut ndaj institucioneve të sigurisë.
