Policia Kufitare shqiptare ka vënë në pranga një shtetas të shpallur në kërkim ndërkombëtar, i dënuar me 20 vite burg për trafik ndërkombëtar droge. Arrestimi ndodhi në Pikën e Kalimit Kufitar Qafë Thanë, në hyrje të Shqipërisë, gjatë kontrolleve të shtuara për evidentimin dhe ndalimin e personave në kërkim.
I arrestuari është Alija Arslan, 34 vjeç, me banim në Kërçovë të Maqedonisë së Veriut. Verifikimet e kryera në bashkëpunim me Interpol Tiranën konfirmuan se ai ishte shpallur në kërkim nga Interpol Bern në Zvicër, pas një urdhri të lëshuar nga Prokuroria e Kantonit Argau.
Arslan është dënuar me 20 vite burg për përfshirje në trafik ndërkombëtar të lëndëve narkotike, në bazë të nenit 19 të Ligjit zviceran mbi Narkotikët dhe Substancat Psikotrope.
Aktualisht, autoritetet shqiptare dhe ato zvicerane, përmes Interpol Tirana dhe Interpol Bern, po punojnë për finalizimin e procedurave të ekstradimit të tij drejt Zvicrës, ku do të vuajë dënimin e dhënë nga drejtësia zvicerane.
