Policia e Durrësit ka zbuluar dhe goditur një rast të ushtrimit të prostitucionit në zonën e Qerretit, Kavajë, duke vënë në pranga dy shtetase kineze të moshës 42 dhe 41 vjeç. Të dyja akuzohen për veprën penale “Prostitucioni”.
Sipas njoftimit zyrtar të policisë, pas një hetimi dyjavor të zhvilluar me metoda proaktive nga Sektori për Hetimin e Trafiqeve të Paligjshme dhe Komisariati i Kavajës, u finalizua operacioni i koduar “Baza”, i cili çoi në identifikimin dhe ndalimin e dy grave të huaja. Hetimet treguan se ato kishin marrë me qira një apartament në Qerret, ku ofronin shërbime seksuale për klientë të siguruar përmes rrjeteve sociale, me pagesa që varionin nga 80 deri në 200 euro.
Përveç arrestimit të dy grave, u proceduan penalisht edhe 6 shtetas shqiptarë që dyshohet se kanë përfituar shërbime seksuale kundrejt pagesës. Të gjithë do të hetohen për të njëjtën vepër penale.
Policia thekson se dy shtetaset kineze kishin hyrë në Shqipëri me status turistik, por po ushtronin aktivitet të paligjshëm me qëllim përfitimi financiar. Gjatë kontrolleve u sekuestruan para në euro dhe dollarë, si dhe dy telefona celularë të përdorur për komunikimet me klientët.
Materialet e mbledhura nga hetimi i janë referuar Prokurorisë pranë Gjykatës së Juridiksionit të Përgjithshëm Durrës për veprime të mëtejshme procedurale. Operacioni “Baza” konsiderohet pjesë e vijimit të aksioneve policore për goditjen e rasteve të prostitucionit.
