Gazetari Osman Stafa ka denoncuar një situatë kritike në Spitalin Onkologjik në Tiranë, ku prishja e Akseleratorit Linear 2 ka çuar në ndërprerjen e trajtimeve për pacientët me kancer. Ai thekson se Shqipëria disponon vetëm dy aparate të tillë për radioterapi, dhe mosfunksionimi i njërës prej tyre ka lënë mijëra pacientë pa mjekim.
Sipas denoncimit, aparati i dytë nuk është në gjendje të përballojë vetë të gjithë ngarkesën e pacientëve, duke bërë që spitali të njoftojë ndërprerjen pa afat të seancave për pacientët onkologjikë. Stafa thekson se kjo situatë është veçanërisht alarmante, pasi radioterapia kërkon vijimësi për të qenë efektive, gjë që aktualisht nuk mund të garantohet.
Në postimin e tij, gazetari kritikon ashpër institucionet përgjegjëse për mungesën e një plani emergjent dhe për mosveprimin ndaj një problemi që prek drejtpërdrejt jetën e pacientëve me tumore.
“Është situatë alarmante!!! Prishja e Akseleratorit Linear 2 ka çuar në ndërprerjen e trajtimeve. Mjekët vetë pohojnë se radioterapia nuk ka efekt pa vijimësi. Por shteti nuk ka rezervë, plan emergjent apo ndjeshmëri njerëzore,” shkruan ai.
Stafa vë në dukje se ndërprerja e trajtimeve po ndodh në një kohë kur pacientët përballen me një betejë të përditshme për jetën dhe se çdo ditë e humbur ka pasoja të rënda për shëndetin e tyre. Ai nënvizon se, për të shmangur situata të tilla, vendi ka nevojë për të paktën dy akseleratorë të tjerë. Kostoja e tyre, sipas tij, arrin rreth 4 milionë euro.
“Ata dy që janë, prishen prej mbingarkesës çdo 2-3 javë,” thekson gazetari, duke kërkuar ndërhyrje të menjëhershme nga autoritetet për të siguruar vijimësinë e trajtimit të pacientëve me kancer.
