Industria e influencuesve në Shqipëri po njeh rritje të shpejtë dhe po kthehet në një nga sektorët më fitimprurës të ekonomisë digjitale. Por paralelisht me këtë zgjerim, është rritur edhe numri i individëve dhe bizneseve që nuk deklarojnë të ardhurat e përfituara përmes platformave online.
Drejtoria e Përgjithshme e Tatimeve ka nisur një hetim të zgjeruar ndaj 100 individëve dhe subjekteve që operojnë në rrjete sociale, të cilët dyshohet se nuk kanë deklaruar të ardhurat e realizuara përmes platformave si Facebook, TikTok, Instagram, YouTube, Google apo PayPal.
Sipas një njoftimi zyrtar të publikuar nga Tatimet, nga verifikimet paraprake rezulton se afro 33 milionë euro janë përfituar dhe nuk janë deklaruar, duke përbërë kështu një hendek të madh në përmbushjen e detyrimeve fiskale.
Megjithatë, autoritetet dyshojnë se shifra reale mund të jetë edhe më e lartë, pasi një pjesë e mirë e të ardhurave që gjenerohen nga përmbajtjet online nuk pasqyrohen në regjistrat fiskalë.
Rritja e audiencës në rrjetet sociale ka shtuar mundësitë për fitim për krijuesit e përmbajtjes, duke e kthyer këtë sektor në një ndër burimet kryesore të të ardhurave për individë të pavarur.
Të dhënat e Tatimeve tregojnë se çdo rrjet i madh, TikTok, Facebook dhe Instagram ka mbi 1.2 milionë përdorues aktivë shqiptarë, ndërsa platforma X numëron rreth 200 mijë përdorues. Ky potencial i madh ndjekësish është kthyer në kapital financiar për influencuesit dhe sipërmarrësit digjitalë.
Përmes platformës DIVA 2024, administrata tatimore u bën thirrje të gjithë tatimpaguesve që të vetëdeklarojnë të ardhurat nga aktivitetet online për të shmangur penalitete apo masa administrative që mund të pasojnë nga hetimi.
Megjithatë, praktika e deritanishme tregon se një pjesë e madhe e krijuesve digjitalë vijojnë të qëndrojnë në informalitet, çka sfidon përpjekjet e shtetit për ta futur këtë sektor në binarët e kontrollit fiskal.
