Ka nisur edicioni i 21-të i Festivalit Ndërkombëtar të Monodramës, një nga ngjarjet më të spikatura teatrore në juglindje të vendit.
Këtë vit, festivali shtrihet në dy qytete, Maliq dhe Pogradec, duke e bërë më të gjerë shtrirjen artistike dhe gjeografike.
Pjesa më e madhe e shfaqjeve do të zhvillohen në Pallatin e Kulturës “Dhimitër Orgocka” në Maliq, i cili ndodhet ende në proces rindërtimi, ndërsa netët e tjera do të mbahen në Pogradec.
Organizatori i festivalit, regjisori Festim Tomori, thekson se ky format i ri sjell një përfshirje më të madhe dhe një nivel më të lartë cilësie në interpretim: “Këtë vit, përveç Maliqit, vendosëm të përfshijmë edhe Pogradecin. Monodrama po zgjerohet, dhe bashkë me të, edhe cilësia e pjesëmarrësve. Kemi artistë nga Kievi, Kroacia, Greqia, Polonia, Rumania dhe SHBA.”
Një ndër zërat më të fuqishëm në këtë edicion janë aktorët nga Ukraina, të cilët sjellin në skenë dramat e luftës përmes interpretimeve të forta dhe të ndjera.
“Është hera ime e parë në Shqipëri. Në skenë do të vendos një histori të vërtetë nga Ukraina. Çdo ditë atje shohim gra, gjyshe e nëna që thërrasin emrat e fëmijëve të tyre në luftë. Do të përpiqem të bërtas edhe këtu në skenë, për të sjellë të vërtetën tonë,” u shpreh aktorja Inna Goncharova.
Karyna Levyshchenko, një tjetër aktore nga Ukraina, theksoi rëndësinë që ka për artistët ukrainas prezenca në festivale ndërkombëtare në këtë kohë të vështirë për vendin e tyre: “Jemi mirënjohës që na mirëprisni. Është thelbësore për ne të tregojmë botës se çfarë po përjetojmë.”
Festivali do të zgjasë pesë netë, me interpretime solo nga aktorë të ndryshëm ndërkombëtarë. Në natën e fundit, një juri profesionale do të përzgjedhë interpretimet më të mira të këtij edicioni.
