Murtaja e ruminantëve vijon të përhapet në zona të reja të vendit, duke prekur tashmë edhe fshatin Shkozë të bashkisë Maliq në qarkun e Korçës. Kjo është vatra e dytë e konfirmuar në këtë zonë, duke e rritur më tej hartën e infeksionit në vend.
Sipas të dhënave zyrtare, në fermën e prekur në Shkozë do të asgjësohen 192 krerë bagëti për të frenuar përhapjen e sëmundjes. Situata konsiderohet me rrezik të lartë, pasi në një rreze prej vetëm 500 metrash ndodhen disa ferma të tjera, të cilat strehëzojnë mbi 5000 krerë të ekspozuar ndaj infeksionit.
Autoritetet kanë vendosur të marrin masa të menjëhershme, duke përfshirë asgjësimin e kafshëve të sëmura dhe vendosjen e një perimetri sigurie prej 3 kilometrash përreth vatrës, që do të monitorohet nga shërbimet veterinaro-sanitare.
Kjo vatër i shtohet rasteve të konfirmuara më herët në Shkodër, Dibër, Bulqizë, Tiranë, Korçë, Devoll, Skrapar, Lushnjë dhe Gjirokastër, duke çuar në 11 numrin total të vatrave të identifikuara dhe në 13 numrin e fermave të prekura.
Deri tani, numri i kafshëve të asgjësuara në të gjithë vendin ka arritur në rreth 1400. Megjithëse janë ndërmarrë masa parandaluese si ndalimi i tregtisë së gjësë së gjallë dhe kufizimi i kullotave, përhapja e sëmundjes vijon me ritme të larta.
Veterinarët bëjnë thirrje për bashkëpunim të menjëhershëm nga ana e fermerëve, duke kërkuar raportimin e çdo rasti të dyshuar, me qëllim izolimin dhe trajtimin në kohë. Ministria e Bujqësisë deri më tani ka dhënë vetëm këshilla mbi mënyrat e parandalimit, ndërsa nuk është shprehur ende nëse fermerët do të dëmshpërblehen.
Përhapja e murtajës në Shqipëri ka ardhur si pasojë e futjes kontrabandë të kafshëve nga Rumania me certifikata të falsifikuara, ndërkohë që dështimi i kontrolleve veterinare në dogana dhe tregje ka lejuar përhapjen e saj në disa qarqe të vendit.
