Agjencia Ndërkombëtare për Energjinë Atomike ka konfirmuar se Izraeli ka goditur një punishte centrifugash në Isfahan të Iranit, një ndërtesë e përfshirë në procesin e pasurimit të uraniumit.
Lajmi u bë i ditur nga kreu i IAEA-së, Rafael Grossi, i cili theksoi se në këtë objekt nuk kishte material bërthamor, çka e përjashton rrezikun e ndonjë ndotjeje radiologjike për publikun.
Sulmi në Isfahan përbën goditjen e tretë të një objekti bërthamor iranian nga Izraeli që nga shpërthimi i luftimeve më 13 qershor.
Më parë, forcat izraelite kanë goditur Qendrën Kërkimore në Teheran dhe një punishte tjetër në qytetin Karaj, nënvizon agjencia.
Duke raportuar përpara Këshillit të Sigurimit të OKB-së, Grossi paralajmëroi se këto sulme kanë sjellë “një përkeqësim serioz të sigurisë bërthamore” në Iran.
Edhe pse deri më tani nuk është regjistruar ndonjë lëshim radiologjik që të rrezikojë popullsinë, shefi i IAEA-së nënvizoi se rreziku për një ngjarje të tillë është real dhe i pranishëm.
